坦率剖白內心世界！張敬軒《軒仔與他的產地》細說當年，網民：「一個鐘真係唔夠睇！」

張敬軒近年多多搞作，除咗扮女聲以「降兩度」身份開Concert之外，最近亦都同TVB合作拍攝《軒仔與他的產地》，講述佢出生、成長嘅地方-廣州～噚晚播出嘅第一集，一開播就引嚟網民熱話，唔少Comment仲大讚軒仔添！

張敬軒喺一個充滿壓力嘅家庭成長，細細個六年級已經學識自己煮飯俾全家食，考試成績唔好亦都會俾呀媽打，其他小朋友睇卡通嘅時候，佢就要練琴！直到而家37歲人都未試過俾媽媽讚過⋯⋯而軒仔之所以踏上音樂呢條路，亦都係靠張爸爸嘅栽培～

好多人以為做明星好風光，但軒仔心入面都感到好對唔住媽媽，因為佢自覺冇做好「兒仔」嘅責任～張媽媽曾經講過：「我唔想你做明星，我寧願你做消防又好、公安又好，剩係想你定時定候返屋企飲湯食飯」

軒仔嘅明星之路唔係一開始就一帆風順，17歲嘅時候軒仔曾經拎住3萬蚊，同一間公司簽約，但一個禮拜後個騙子就一走了之！因為俾人呃完，佢就決定退居幕後，仲做咗錄音室嘅學徒，之後仲升咗做「音頻製作部主管」，只可惜公司因為經營困難又倒閉～最後佢喺2003年帶著3000蚊嚟香港，喺尖沙咀二、三星嘅酒店住足9個月～好彩之後得到唔少曝光機會，成功得到香港人嘅喜愛～

相信唔少觀眾都對張敬軒間百年古屋非常有興趣，充滿格調嘅大屋令人完全好似置身外國嘅古堡之中！喺節目入面真係Feel到軒仔嗰種個人品味絕對唔係扮出嚟，亦都好識得珍惜舊屋主嘅心血、重視保育，超有心！

雖然而家嘅中港矛盾鬧得好僵，但係網民亦都大讚：「一個人嘅出身地冇得揀，軒仔嚟香港唔係只想拎著數，佢真係出力出錢保留好多文化嘢，可能佢明白大陸有幾差，先咁珍惜香港」、「好鍾意佢好有內涵 同埋尊重長輩 懷舊事物嘅態度 好多人去到某啲位置就會變咗 但佢靠努力行到今日呢個位 都繼續出錢出力保育文化同音樂」

而且大家睇個節目嘅時候都覺得聽軒仔講嘢好舒服：「字正腔圓，好溫柔，好有內涵嘅感覺」

睇完呢個節目真係會由衷地佩服佢經歷咁多事，都仍然堅持落去、不斷自我增值嘅精神～雖然佢唔係土生土長嘅香港人，但佢比起好多香港人更加識得點樣去保衛香港文化，呢樣都係我地好需要學習嘅事啊～

Text：Girls Editorial

Photo Source：TVB