「IT狗」道出毒男心聲！《愛回家》池美麗神還原「飯托Karen」，網民：半個鐘已經好睇過tvb全晚嘅節目！

兩個月前有單新聞踢爆「美女飯托」，而飯托女主角Karen因為同《愛回家》入面嘅「美麗」太似樣，所以當時唔少網民都話要推到《愛回家》拍呢集為止！結果《愛回家》嘅編劇們真係有聽網民意見，噚晚嗰集真係實現網民願望，重演「美女飯托」一幕！

Terry同一班IT狗去食飯，Terry想叫個「肉醬意粉」嚟食，點知原來Keyboard喺網上識咗個「飯腳妹」，「飯腳妹」一坐底就叫咗5個肉醬意粉，Keyboard最後要用3千幾蚊埋單！自此就患上創傷後遺症，一聽到「肉醬意粉」就要生要死，覺得有人迫害佢！

Terry發覺原來Keyboard口中嘅「飯腳妹」就係池美麗，然後仲上咗餐廳度質問美麗！美麗就話自己係專登上網識男仔嚟忘記博士⋯⋯

美麗仲要P到張相勁靚，同新聞講嗰單飯托事件簡直一模一樣呀！美麗仲爆埋，係Anita教佢P圖、上網識男仔，令到Terry同池子孝都覺得事有蹊蹺！

Anita原來同緊Mouse拍拖，不過Anita就只係當佢係「水兵」，不斷叫Mouse俾錢食貴飯、送禮物，又送貴價美容儀器，又要佢買危疾保險！一聽到Mouse話唔買保險，Anita就即刻扮嘢話「婆婆冇帶鎖匙」，要即刻返屋企～

原來佢送走Mouse之後又上返間餐廳「收佣金」，係名乎其實真真正正嘅「飯腳妹」！有見及此，幾個「IT狗」就想識穿Anita，點知Mouse執迷不悟沉哂船，仲要話佢地幾個係妒忌佢可以出Pool先會拍呢啲片！

幾個「IT狗」仲因為Anita呢件事，而話要Unfriend大家！見到佢地一班毒男表情激動、口齒不清咁樣講嘢 ，係咁話要Unfriend對方真係好搞笑！佢地3個真係完全演活毒男！

正當Mouse話要幫Anita買保單嘅時候，Terry走出嚟叫Anita唔好再呃佢：「你有冇諗過一個隱閉毒男，要有幾大勇氣，先可以從電腦後面走出嚟開始佢嘅初戀，佢為咗你，堅持你唔係呃佢，已經同班兄弟反哂面！你都仲好意思呃佢，你係唔係人呀？」呢段說話真係講出唔少毒男心聲！

聽完Terry一番說話之後，Anita重拾自尊仲決定Del App金盆洗手，以後都唔再做「飯腳妹」！

呢集「美麗飯腳妹」真係跟得勁足，令網民再次諗起之前單新聞，唔少網民都話今集勁搞笑！亦都大讚「IT狗」幾位演員啲戲神演繹「IT毒男」氣息，仲話「班IT狗痴哂線」、「IT 3子啲戲唔錯，夠放」、「IT三友好睇過尋寶圖5子」，唔知睇完網民嘅留言，編劇們會唔會俾多啲戲份俾IT三子呢？

Text：Girls Editorial

Photo Source：TVB