以自身力量宣揚文物保育！張敬軒帶借豉油鄰居參觀百年古宅，為保育犧牲私隱獲網民大讚！

上星期《軒仔與他的產地》第一次公開張敬軒嘅百年古宅，內裡無論古董傢俱定係裝潢佈置都令到唔少網民嘆為觀止！可能見到大家一直都對佢間屋勁有興趣，軒仔就專登拍咗段「煩膠鄰居硬闖張敬軒大宅Home Tour」，睇完真係會對張敬軒好感度Up！

張敬軒今次以搞笑灰諧嘅形式去介紹自己間屋，首先食食吓杯麵嘅時候，煩膠鄰居話自己屋企打邊爐冇鼓油，所以就問軒仔借豉油，見到軒仔間屋幾靚就勁唔客氣話要入去參觀！

軒仔屋企裝修得古典又優雅，呢間屋話係喺外國都會有人信！「鄰居」見到呢間咁靚嘅屋都忍唔住話「呢度好似廠景咁！係咪有拍過《珠光寶氣》」軒仔懶得理個煩膠鄰居，就瘋狂Hea答佢：「係呀係呀，呢啲全部都係淘寶㗎」勁搞笑～

然後個鄰居話佢係咪冇錢買新傢俬，佢即刻黑面個樣勁得意！！

軒仔個飯廳真係超級大，嗰盞水晶燈又係勁靚，好有歐洲貴族Feel～～

最鐘意開黃腔嘅軒仔今次都唔例外，當鄰居話好想要一個「鹿頭」嘅時候，佢就話「有好多頭㗎，送過第二個頭俾你呀，有啲爬行類蜥蜴、龜呀嗰啲，龜呀不如，我見過有一隻大嘅⋯⋯」

每一個角落都可以感受到濃濃嘅歐陸氣息！

呢個係軒仔最鍾意嘅擺設，係海神波塞冬神像～因為佢好鐘意《聖鬥士星矢》入面嘅波塞冬，所以都專登買咗一個返屋企！

順帶一提，軒仔隻狗仔真係勁得意！！！！唔少網民話好羨慕「妹妹」有咁大地方跑嚟跑去～

連個廚房都靚到不得了～

張敬軒可唔可以停止咁可愛嘅行為！！！

搞笑完一輪之後，軒仔其實想大家關心多啲香港老建築、文物保育嘅議題，希望用自身嘅力量去宣傳呢啲意識，即使自己唔再住喺呢度，都會令到更加多人認識呢個地方～軒仔住嘅地方喺香港大學轄下嘅文物，被列為二級歷史建築物～

呢間大宅喺1926年建成，香港大學其後買下業權～軒仔喺入住呢間大宅之前，曾經帶埋玫瑰花去到大宅主人嘅墓地前，話俾佢地知會好好照顧呢個地方！而且為咗重現大宅昔日風光，軒仔亦都專登喺世界各地搜羅唔同嘅傢俱擺設，真係超級有心思！

唔少網民睇完呢條片之後，都大讚軒仔身體力行地保育歷史文物：「多謝你為保育而犧牲私隱」～更多嘅網民係話「好想做煩膠鄰居」、「軒仔我又要借豉油」、「好想做你個工人」等等～軒仔用呢種手法提高香港市民對於文物保育嘅意識，希望大家睇完條片之後，都會識得欣賞香港獨有嘅建築同文化啦～

Text：Girls Editorial

Photo Source：張敬軒