康華進軍樂壇做新人！佘詩曼出錢出力全心支持閨蜜，深厚閨蜜情誼讓人羨慕！

人生有限，有夢就要去追！康華之前登上《流行經典50年》演唱《你怎麼捨得我難過》，被網民大讚一鳴驚人！皇天不負有心人，今年終於被唱片公司發掘，以47歲之齡加入樂壇，仲得到閨蜜佘詩曼出錢出力幫忙，姊妹之情真係令人羨慕！！

好姊妹就係嗰個會喺你身邊一直支持你、陪住你渡過人生旅程嘅人，無論做咩都好佢都會喺你身邊默默扶持你，佘詩曼同康華亦都一樣！佘詩曼對於康華進軍樂壇之路都俾咗唔少意見，康華最初拍攝嘅宣傳照過於傷感，佢就提議不如影過輯～

不過阿佘得知唱片製作預算有限，寧願自掏腰包為康華重新影過所有宣傳照，希望可以將康華最好嘅一面呈現喺觀眾眼前！而且阿佘仲仗義做攝影指導，出錢約好哂攝影團隊、化妝同設計師，仲幫手做埋形象指導，真係出錢又出力，一心只想康華成功！

面對好朋友咁幫忙，康華亦都好感動咁表示：「我唔敢問阿佘用咗幾多錢，但我會送禮物作回禮，非常珍惜呢位好朋友，就算要我赴湯蹈火、做牛做馬都在所不辭，今世做唔到下一世都會！」

其實阿佘一向都係一個重情重義嘅人，無論係對待朋友定係屋企人，都會盡心盡力對佢地好！阿佘5歲喪父，由媽媽一手湊大三個仔女，就算屋企幾窮都好，媽媽都堅持送阿佘去瑞士讀書，令佢更加愛錫媽媽！阿佘之前亦都講過，2005年去北京參加頒獎禮嘅時候，未能探望喺美國患重病嘅媽媽令佢感到非常內疚，自此之後佢就決定每個月都要抽時間去探望媽媽！

阿佘舊年憑著《延禧攻略》成功喺內地爆紅，密密返大陸搵錢～不過佢都冇忘記一班好朋友，間唔時都會同班姊妹嚟個閨蜜聚會！雖然佢好忙，但契女嘅生日都會抽空出席～

一班好姊妹真正想見面，又點會抽唔到時間出嚟呢～～

阿佘除咗人靚之外，對朋友都好好！大家身邊又有冇呢一種甘願為你赴湯蹈火嘅閨蜜呢？

Text：Girls Editorial

Photo Source：Weibo、Instagram