笑到流眼淚！《愛回家》盧宛茵扮尖酸刻薄親戚勁搞笑，劇情神展開、關係變到七國咁亂！

每個家庭都會有一啲尖酸劇薄、麻麻煩煩嘅親戚，《愛回家之開心速遞》熊家都唔例外！噚晚播出嘅《赤口大兜亂》裡面，盧宛茵驚喜客串飾演勁黑人憎嘅親戚「崔Auntie」，短短一集就已經成功令網民高呼「強烈要求盧宛茵加入《愛回家》」！

啱啱喺加拿大回流返嚟嘅「崔Auntie」，上去人地屋企拜年仲要勁口賤，乜都嫌三嫌四～又話人地屋企又細又舊、又話全盒啲糖蓮子太細粒、又話熊若水嫁唔出係因為生得太高，睇死佢地三個女都唔會嫁出得！搞到熊家上上下下都怕咗呢個口沒遮攔嘅「崔Auntie」！

「崔Auntie」堅持赤口都要上嚟拜年，根叔唯有諗條橋，扮熊家上下都搵到另一半，扮到全家都好幸福美滿，令到「崔Auntie」一粒聲都冇得出～

一向「度縮」嘅根叔甚至俾500蚊俾「妹豬」陳師奶嚟扮佢女朋友⋯⋯真係勁搞笑！

不過事情又點會發展得咁順利！？「崔Aunite」比預期中早到，但係尚善同龔燁又有事唔可以嚟拜年！根叔唯有將計就計，叫潮偉扮做若水嘅男朋友！

仲叫美麗扮係金城安個女朋友！！

點知Bonnie喺呢個時候又上咗嚟！安仔就唯有話Bonnie係熊樹仁個女朋友，啲關係變到七國咁亂！！

突然間之前話嚟唔到既龔燁、David都上咗嚟！David只好將計就計，就成為咗根叔女朋友！

「崔Auntie」之後竟然意外見到David同樹仁攬埋一齊、安仔同Bonnie態度親暱、尚善又同朱凌凌成為一Pair，令到「崔Auntie」對熊家上下感到勁錯愕！

然後又聽到尚善同潮偉講：「我有咗，爸爸都唔係你啦！」

「崔Auntie」見到根叔同陳師奶卿卿我我，終於忍唔住大鬧：「我寧願你地個個都鰥寡孤獨，好過而家個個都淫賤不能移呀！不過最淫賤都係你呢條淫根！」

最後根叔真係忍唔住大鬧：「你估你個仔又好好呀？未夠20歲就光頭，我聽日就買張機票飛去加拿大問候你全家！」然後熊家勁齊心做啦啦隊支持根叔，真係睇到大快人心呀！

呢一集嘅關係真係超亂，而且由盧宛茵飾演尖酸刻薄嘅親戚亦都勁到肉，可能一路睇慣佢做呢啲角色，就更加覺得佢做得好好！！噚晚呢集真係好搞笑，如果盧宛茵加入《愛回家》就好啦～～

Text：Girls Editorial

Photo Source：TVB