字裡行間滿滿的愛！有一種友誼叫「黃翠如與洪永城」，洪仔：「諗過儲錢俾你買姑婆屋」～

今年係蕭正楠同黃翠如婚後第一個農曆年，之前蕭正楠仲喺Instagram話「等咗幾十年終於可以派利是」，兩人嘅好朋友洪永城仲留言話「我等左（咗）十幾年都係等你呢封。」唔少網民都喺度期待洪仔向翠如拜年，結果佢真係Po咗相，仲打咗段好感人嘅文字，令到網友們都覺得好感動！

蕭正楠同黃翠如婚後第一個農曆新年，名正言順邀請各方好友上屋企拜年逗利是，未婚嘅好朋友們梗係唔放過呢個逗利是嘅好機會！

洪永城去蕭生蕭太屋企拜年後，仲好感性咁話：「識你咁耐，今次唔講衰嘢喇。等咗你咁多年終於收到你嘅利是，果陣仲以為一世都冇咁嘅機會，我仲曾經諗過儲錢俾你買姑婆屋，不過而家又識煎蘿蔔糕，咁難煎嘅嘢都俾你煎到，真係好難得、又識洗碗，又有一件燒腩肉照顧你，咁我就放心啦。恭喜你找到人生旅程入面找到一個好好嘅旅伴。」

呢一句「曾經諗過儲錢俾你買姑婆屋」令唔少網民都表示好感動，亦都有令網民聯想：「成日覺得洪仔同脆魚係鐘意過大家，但又始終行唔到果一步既果種關係。即係似成日講一生最愛果個永遠唔係同你百頭到老果個咁樣」

翠如亦都Po相向洪永城催婚：「係你仲未娶到老婆煎蘿蔔糕俾你食之前，我們家都歡迎你，不過娶到老婆之後，就唔好來打攪我地啦。」表面上好似好嫌棄洪仔，其實字裡行間都係滿滿嘅愛～

之前有一篇網絡潮文《每個男人心裡面都有一個黃翠如》，當時翠如仲親自喺Facebook感性回應：「你哋好friend ，一齊嗌交、一齊講心事、一齊去旅行，但係永遠唔會撻著。你哋好似總有D無名的共鳴 ，人地永遠以為你地一對 ，但你哋心裡面知道無可能」

網民睇到翠如嘅回應都感到無比感慨：「呢個世界上可以命令洪永城嘅只有黃翠如」、「能成為密友大概總帶著愛」！不過亦都有網民覺得「成日覺得外人成日夢幻化佢地段關係，其實現實就係一對永遠唔會鐘意對方既死黨」～

好多人都話男同女之間冇可能只有「純友誼」，事實上黃翠如同洪永城就係一個好好嘅例子呀～

Text：Girls Editorial

Photo Source：Facebook、Instagram