想有呢啲閨蜜！「艾妞」楊秀惠買CHANEL手袋送「沅婉」，蔡思貝：有你在我生命裏已是最大的獎勵

「閨蜜是用來寵著的」，相信唔少女生都好同意呢句說話！因為買嘢送俾閨蜜往往來得「疏爽」，自己使用嘅嘢反而慳住慳住用就Okay～看見閨蜜用得開心，就覺得好值得啦～最近喺《大帥哥》入面表現出色嘅楊秀惠被媒體影到去CHANEL大買特買，當大家以為佢係買嘢獎勵自己嘅時候，其實佢係買生日禮物送俾同劇閨蜜蔡思貝！

2月頭生日嘅蔡思貝（Sisley）噚晚喺Instagram出Post，短片入面嘅Sisley笑得勁開心喺度拆緊CHANEL包裝袋，寫住「其實⋯佢笑到4萬咁口，係買禮物比我。」仲Tag咗「甜蜜笑容背後的真相」、「被寵的我」

拉到後面一睇，係記者影到楊秀惠笑得勁開心咁買名牌袋嘅新聞！原來楊秀惠（Vivien）揀緊嘅就係送俾蔡思貝嘅生日禮物～～相信Vivien一定係諗到蔡思貝收到禮物嗰陣會有幾開心，先會笑到4萬咁口去買袋！！

其實早喺Sisley生日正日，楊秀惠已經Post咗同蔡思貝慶祝生日嘅相，仲要好低調咁Sticker遮住佢送俾蔡思貝嘅CHANEL袋！！如果唔係Sisley Post出嚟，大家都唔會知道原來Vivien送咗樣名貴禮物俾好姊妹～～

當Sisley出完Post之後，唔少好朋友都留言表示羨慕！Sisley緋聞男友余德丞衝出嚟話：「我生日個陣唔使太重手，折現就得」；一齊拍《大帥哥》嘅洪永城就Tag埋Vivien問佢：「為甚麼我沒有」真係好搞笑！！

楊秀惠同蔡思貝喺《大帥哥》入面分別飾演張衛健嘅老婆「艾妞」同埋「沅婉」，拍完劇集之後亦都培養咗好深厚嘅友誼！！蔡思貝亦都向楊秀惠表示：「有你在我生命裏做我的朋友已經是一個最大的獎勵」，真係超Sweet～

佢地兩個嘅友誼真係令人羨慕！出嚟社會工作後，要搵到一個懂你、愛你、一心為你好嘅閨蜜真係好難得！大家都要好好珍惜自己嘅閨蜜呀～～

Text：Girls Editorial

Photo Source：Instagram