最溫馨嘅LAST DAY！兆基創意書院設「特別通道」撐中六學生，抱抱、High Five、握手、任影唔嬲！

中學對於學生嚟講真係充滿感情，所以都會趁著Last Day同老師同學合照，留返個美好嘅回憶！香港區有間名校就因為中六學生Last Day問題引發牽然大波，全城熱烈討論！不過香港兆基創意書院就唔同，老師校長專登為中六學生安排「特別通道」，令中六學生留低一個最難忘溫馨嘅Last Day！

3月8號係香港兆基創意書院中六學生嘅最後上課日，一返到學校門口就見到大閘另外有一個「特別通道」，寫住「中六特別通道」專門俾該校嘅中六學生進入！

一入到去就見到老師們列隊歡迎中六學生，老師仲貼心地拎住一大桶珍寶珠俾學生拎，不過令學生心甜嘅唔係糖果，而係學校老師嘅嗰一份心意啊！

除咗糖果之外，老師仲舉著寫咗「中六學生抱抱、Hi Five、握手」，所有進門嘅學生都有同教師一一擁抱，場面超級溫馨！

上載完呢段影片之後，校方亦Upload埋師生喺圖書館嘅大合照，有一段超級催淚嘅字句之餘，背景音樂仲要係Rubber Band嘅《未來見》：

【今堂真係最後一堂喇】

伴你開玩笑，悶了相約見，年月裡頭天天笑未停......
校長小姐勉勵大家：「恭喜大家畢業！恭喜大家唔需要再對住我！希望大家都盡力，第一科下星期就開始，眨吓眼就一個月，好快成個挑戰就過了。之後你們想做什麼，只要不犯法我都鼓勵大家去試。希望大家努力一點，今朝老師送了一個窩心的回憶給大家，希望你們喜歡。祝大家將來能夠繼續做你們喜歡的事情。」好啦 #未來見

仲要Tag住：「中六人類唔好喊、笑到最後、影相放題、一班人齊齊整整咪幾好、其實得明咪反下黎囉、書院嘅大門永遠為你打開」相信睇到呢啲文字嘅學生都會覺得好warm好感動！！

唔少網民睇完呢段影片之後都大讚書院安排得好好：「呢啲咪叫學校囉！溫情洋溢，人情味濃厚，好聚好散，老師學生們都留下一個美好回憶！」、「很感動，我也想做他們的學生」、「最like 係後面既banners『生之為人 不忍沈默』」

呢間學校嘅師生真係好有愛啊～～人生只有一次嘅中學Last Day可以咁愉快地渡過，相信佢地都覺得好難忘！

Text：Girls Editorial

Photo Source：兆基創意書院Facebook