由?模變成影后！周秀娜努力融入香港獲網民大讚，網民：「有腦又上進嘅我只係諗得起佢！」

一講起「o靚模」大家都會諗起始祖元老級嘅周秀娜Chrissie！近年佢擺脫呢個身份，全力投入電影圈，前年仲憑著《29＋1》獲提名最佳女主角，絕對係轉型嘅最佳範本呀～最近佢接受訪問時講到自己細細個就被磨練出「唔輸得、好勝心強」嘅性格，成功背後負出嘅努力絕對值得我哋學習呀！

Chrissie最近接受《鏗鏘集》訪問時講起童年生活，當年Chrissie只得10歲就跟著屋企人由汕頭移居香港，雖然聽得明廣東話但係唔夠膽講出口，甚至返學頭一個星期都唔敢出聲⋯

亦因為以前喺汕頭冇學過英文嘅關係要需要留班一年，Chrissie就話：「冧咗一年，個感覺就係比佢哋（同班同學）大個啲，但係英文科26個字母都唔識，嗰時好想快啲追到佢哋，好想融入香港呢個環境。嗰陣時我真係因為呢個諗法，一定要畀你覺得我係得嘅，由唔識26個字母到考到100分。」就係呢種性格令到佢可以適應唔同嘅環境，面對不同挑戰亦可以迎難而上～

Chrissie以前就係性感嘅代名詞，但爆紅之後亦都因為佢嘅高EQ而被網民大讚！早喺2009年，佢受邀到科大出席座談會，同教授一齊解讀「o靚模」現象～期間教授間中就拋出英文問「係咪會好極度地享受呢種好Intensive、好Emotionallyintensive⋯⋯」Chrissie都好大方咁承認自己「唔係好明」、「你可唔可以問多次」，慘被網民嘲笑！

但佢事後接受傳媒訪問時仲好謙虛咁話：「我肚裡面啲墨水真係唔夠」、「我嘅工作係娛樂圈游走生物，我清晰明白自己冇嘢可以直接教到學生，反而呢次就令我學到嘢」、「無論學生／藝人都應該增值自己，有機會我都想去讀大學」，超大方嘅回應被大家反讚佢EQ夠高！

睇完娜姐嘅報導後，唔少網民都力讚佢嘅性格同態度！「起碼佢自力其力搵錢&肯學廣東話融入香港，而唔係攞綜援呃飯食」、「娜姐真係最後一代新移民，依家嚟個班，廣東話都唔肯學唔肯講」

仲有網民大讚：「同期model有好多，但有腦又上進嘅我只係諗得起佢。雖然學歷唔高，但俾大學教授刁難都仲好大方得體」

周秀娜嘅努力同堅持大家都有目共睹，嚟緊佢仲會同劉德華合作拍攝《掃毒2天地對決》，希望佢可以繼續喺電影圈入面發光發熱啦～

Text：Girls Editorial

Photo Source：Instagram