原來佢已經38歲！張景淳「龔燁」上位成為男神，網民：「真係TVB好少見到咁有氣質嘅男藝人」

等咗成年，終於喺半個月前等到「龔燁」同「熊若水」有情人終成眷屬嘅劇情，仲上演世紀一吻，引起全城哄動！賤賤格格嘅「龔燁」平時自私又充滿心計，唯獨對住「熊若水」先特別唔同，人設贏得觀眾心之餘，張景淳亦都功不可沒～最近佢憑住「龔燁」一角成功入屋，仲俾網民大讚：「好有仙氣」、「真係TVB好少見到咁有氣質嘅男藝人」

張景淳加入TVB已經差唔多10年，以前曾經做過《東張西望》外景主持，直到2011年憑著神劇《天與地》「家明」一角而成名！之前唔少網民都會叫張景淳做「家明」，不過而家大家都叫佢做「龔燁」啦～

留中長髮嘅張景淳同其他TVB男藝人嘅打扮有少少唔同，網民就喺討論區出Post話：「當香港人個個都all back、剷青、Barber、油頭嘅時候，見到呢d與眾不同嘅造型就會眼前一亮，覺得好有仙氣」

然後又有網民話：「真係TVB好少見到咁有氣質嘅男藝人」、「好有個人特色，仲要本身都係靚仔樣，演技都越嚟越自然。」、「長髮眼鏡+三件式西裝 屈到」

「香港好少佢呢個type嘅演員，完美carry長毛金絲眼鏡」、「直頭係二次元走出嚟既男人」網民對於張景淳幾乎都係有讚無彈，真係好少可見到呢個情況呀！

仲有網民大讚張景淳好有日本仔Feel「就連佢啲舉動都好日本少女漫feel，特別係劇入面阿龔啲行為，直頭係少女漫男主角會做既野」其實張景淳本身真係有日文底，考到N3㗎！

由張景淳留長頭髮開始就已經有好多人話佢同鄭伊健好似樣，之前張景淳都有去鄭伊健演唱會，仲一齊合照～～好多網民都喺留言話：「好像兩兄弟」、「有d伊麵2.0咁款」唔講唔知，其實張景淳係伊健Fans，之前仲成日開Live同Fans講好想睇鄭伊健演唱會！

唔講唔知，原來張景淳係唱歌出身，之前喺組合Cheers度唱咗一首《十年約會》，或者女生們會唔知係咩歌，但係一見到歌詞「離和去，像信件，未愛的，偏出現」就即刻會喺腦內響起旋律！估唔到呢隻歌「龔燁」有份唱呀～

呢種中長髮真係冇返咁上下嘅顏值都Carry唔到呀～～希望TVB比多啲機會張景淳發揮啦～

Text：Girls Editorial

Photo Source：Instagram