SAMMI死心了？SAMMI社交網站轉做黑色背景，網民憂抑鬱症復發！

已婚人夫許志安被爆出偷食黃心穎之後，即使許志安噚晚開記者會承認自己出軌，喊哂咁話自己個人「壞咗」、誠心向Sammi認錯，都無阻全城市民鬧爆佢唔配做Sammi老公！不過大家鬧爆佢嘅同時，最擔心嘅都係佢地嘅另一半，鄭秀文Sammi同埋馬國明～今日Sammi嘅社交網站被發現轉咗做黑色背景，令粉絲們都好擔心佢會唔會抑鬱症復發！

自從噚日下午爆出車廂激咀之後，許志安太太Sammi一直未有表態！直至噚晚，有網民發現Sammi嘅Facebook專頁上，封面圖片變成黑色一片！呢種默默表態似係表達自己已經死心～

另外亦發現Sammi嘅經理人郭啟華個人Facebook頭像都轉成黑色，默默支持Sammi！網民就搞笑地話：「轉黑色是為了表達哀悼亡夫」、「人死不能復生，請節哀」，亦有網民將呢個行為解讀為：「世界又一次黑暗了」、「也就是說對許志安心死了」

唔少網民都表示好擔心Sammi會抑鬱症復發！2005年，Sammi拍完電影《長恨歌》之後曾經患上抑鬱症，情緒受到極大困擾，好彩得到朋友以及信仰支持，先慢慢康愎過來！

曾經飽受抑鬱症困擾嘅Sammi曾經分享自己患病經歷，當時佢好似喪失咗分辨飽同餓嘅能力，一起身百無聊賴就開始食嘢，尤其鐘意夜晚出去食，明知自己食得太多，但又控制唔到！今次許志安偷食令到大家好擔心Sammi會大受打擊令到舊病復發，所以都紛紛喺Sammi IG、Facebook留言支持及鼓勵佢！

Fans留言就話：「撐住呀Sammi 無論你有咩想法 都支持你 要堅強呀 我地都挺你！」、「最重要是您的心，不用理會社會的壓力和期望，無論什麼景況，我地都會永遠愛您!!」

希望Sammi好好休息、早日放下，即使取消嚟緊嘅演唱會都唔會有人怪你㗎～～

Text：Girls Style Editorial

Photo Source：Facebook、Instagram