復仇者4今日上映！政府吉祥物組成「守護者聯盟」，網民勁Like：政府今次「跨部門」合作真係好正！

香港政府部門近年宣傳工作做得越嚟越出色，唔同部門都有推出吉祥物，深得一眾市民喜愛！《復仇者聯盟 4：終局之戰》今日上映，噚日政府咁多款吉祥物集結成為香港聯盟「Assemble for HK」，仲推出一系列海報，引來網民一致好評！

政府部門吉祥物平時都只係單獨宣傳，估唔到政府部門今次竟然食住《復仇者聯盟4》條水，嚟個「跨部門合作」，7個政府部門吉祥物齊齊喺噚晚7點，一齊喺社交平台出Post＋上載各人嘅聯乘海報！當中包括超受歡迎嘅消防處「任何仁」、食環署「清潔龍阿德」、環境局「大嘥鬼」等等，所以一推出就得到市民熱烈回響！

今次推出嘅海報設計到好似《復仇者聯盟》電影海報咁！平時寫住MARVEL嘅紅底白字都變成吉祥物嘅名！惡搞還惡搞，呢班吉祥物亦有成功宣傳吉祥物同埋所屬部門嘅訊息，好似「任何仁」就話：「任何仁唔識飛、冇異常大舊肌肉，亦唔會有超級癒合！但係佢勇敢，亦有好強嘅應急能力。佢嘅使命係不計代價鼓勵任何人學齊終極絕招「應急三識」，隨時加入守護地球人行列」

一向深得市民喜愛嘅「清潔龍阿德」就話：「清潔，係我嘅使命；香港，係我嘅屋企。
一個人嘅力量有限，但只要齊心，香港人就有無限動力。只要團結一致，我相信香港一定會變得更好。」

雖然「大嘥鬼」比人話佢似大反派，但其實佢不知幾愛護香港呀：「單單講同口號，係唔夠㗎，起身啦....大家都有責任㗎！用少一支飲管、一個遮袋唔算係咩，但係.......集合咗大家嘅力量，我哋就可以發揮最大能力喇！」

除咗公式宣傳之外，一班吉祥物私底下都有交流㗎！佢地今次都有喺對方嘅Post下面留言，真係好搞笑！！

網民見到今次個Campaign都大讚：「今次有創意，第一次覺得政府做到野」，「難得抽得正條水，又可以起到宣傳效果！」大家睇完笑完都要記住佢地宣傳緊嘅野呀～～

Text：Girls Style Editorial

Photo Source：Facebook