一年改兩次名！黃長興由「致豪」再改「祥興」，蕭正楠：希望佢今年唔好再改名住！

不少藝人為咗星途都會改個方便易記嘅藝名，務求觀眾記得佢地！港男出身嘅演員黃長興早前改咗名做「黃致豪」，不過觀眾都唔係好叫得慣～估唔到過咗半年之後，就由「黃致豪」改返做「黃祥興」，連老友蕭正楠都忍唔住笑佢：「啱啱記得個名，希望佢今年唔好再改名住！」

黃祥興上年就話因為健康問題而改名做「致豪」，無論係觀眾定係身邊嘅朋友都做唔慣呢個新名！之前佢上節目嘅時候，節目組更加喺佢個名「黃致豪」隔離括住（長興），改完大家都係叫佢做長興～

直到今個月，佢又改名做「祥興」！其實就係因為佢覺得大家都改唔到口叫佢做「長興」，所以就再由「致豪」改返做「祥興」！佢接受記者訪問時就話自己一嚟想Keep住個藝名，二嚟相士話個「長」字唔夾佢，所以改個同音嘅「祥」字～

唔止係網民都R哂頭，老友蕭正楠都忍唔住取笑黃祥興：「我同長興...唔係...係致豪...唔係...係祥興又黎到大馬學師啦！啱啱記得個名，希望佢今年唔好再改名住！」連翠如都忍唔住留言話蕭正楠好衰！

之前由黃長興改做「黃致豪」嗰陣，已經引來唔少網民迴響！有網民就話「好似社團咁，陳浩南（洪興）」，仲有網民恥笑話：「黃致豪，字長興，人地復古都唔得？」、「一早改做黃祥興咪算囉！」

其實一直以嚟都有好多藝人改藝名，例如出道多年嘅梁烈唯喺今年改名做梁競徽，就比網民恥笑諧音似「勁廢」，一直以嚟叫開佢「唯唯」嘅亦都要改口～～

唔講唔知，其實女神Ali李佳芯都因為身體問題，由本名「李嘉馨」改做藝名「李佳芯」！

對於出道多年嘅藝人嚟講，突然要觀眾適應叫佢地嘅新名真係需要一段時間，希望祥興唔會再改名啦～～

Text：Girls Style Editorial

Photo Source：Instagram、TVB