無懼惡霸問到阿叔面都青！《東張西望》阮嘉敏獲封正義女神，網民：「佢真係幫東張西望爭返口氣！」

之前一直主要報導娛樂新聞嘅《東張西望》，近排改行本土貼地風格，接連報導唔同時事議題，獲得網民一致讚賞！近日《東張西望》主持阮嘉敏（Mandy）亦都獲得網民力讚表現出色，因為佢追訪大媽大叔表演者，提出尖銳問題令到受訪者面都青，完美KO呢班大媽大叔！

香港一直都有好多大媽大叔「表演者」喺唔同地方開大喇叭表演，聲浪極大之餘，而且呢班「表演者」冇表演牌照，但又接受觀眾打賞，嚴重滋擾街坊！有見及此，《東張西望》派出阮嘉敏Mandy訪問呢班「表演者」，Mandy訪問一位內地大叔：「你地除咗表演之外，仲有收錢喎，係唔係呀？」大叔否應收錢後Mandy唔放過呢個大好機會，繼續問！

「從來冇收過錢？」大叔先話：「如果有人俾錢都好正常」。之後Mandy就開始狙擊：「你岩岩話自己冇收錢，但人地俾錢你，你就有收？」大叔就反稱：「公眾地方係香港政府比大家娛樂嘅地方」、「人地俾我就收㗎啦」

Mandy繼續講：「但你收錢就唔叫做玩」、「點解你唔選擇唔收嘅？」問到大叔口啞啞，面都青埋！

Mandy之後再搵到另一個大媽，問佢有冇申請牌照，大媽話自己抽咗5個月都未抽到牌照。Mandy就不斷Chur住問「咁你咪即係冇牌囉？」、「抽唔到咪即係冇牌囉？」問到大媽冇聲出！（個大媽仲要老羞成怒推咗Mandy一下⋯⋯）

網民睇完呢集亦都大讚Mandy做得好好，不停追問重點問到佢地口啞啞！而且面對大媽郁手郁腳都冇驚過，繼續扑咪亦都非常專業！原來Mandy係中大傳理系畢業，2016年曾經參選港姐，雖然十強止步，但最後亦加入TVB成為《東張西望》嘅主持，近日亦都因為出色嘅表現成功彈起～

呢集播出之後，唔少網民留言支持Mandy：「勇武呀你！TVB少有呢類主持，見你質問佢哋大快人心！keep住你呢個優點，加油！」、「睇左你個訪問，做得好好，轉數快、口齒伶俐」、「佢真係幫東張西望爭返口氣 為港人發聲」

唔少網民都話好開心見到《東張西望》終於有返少少正常嘅報導，更加大讚《東張西望》係TVB近排最高汁嘅節目！希望《東張》可以繼續Keep住質素，保持中立持平啦～

Text：Girls Style Editorial

Photo Source：TVB