抽廿幾萬洗頭水返屋企！《友枱VIP》羅家英：「擺明裝我，當時我已經係光頭」，網民：好過2萬件花之戀啦～

Viu TV嘅節目《友枱VIP》每集都會邀請嘉賓分享「友台」TVB嘅拍攝點滴軼事，最近就成功請到「家英哥」羅家英上嚟分享，期間佢爆出多件TVB爆趣事件，令到在場嘉賓為佢感到無奈之餘，又忍唔住大笑！

羅家英最近分享喺TVB玩遊戲抽獎最搞笑嘅獎品，抽完返嚟直到覺得自己比人玩緊！事緣係佢參加一個綜藝節目，玩遊戲贏咗冠軍，節目組就比佢喺各樣獎品中抽一個，點知一抽就係洗頭水！充滿好奇心嘅家英哥就忍唔住去後面靜靜雞偷睇，點知原來後面全部都係洗頭水，即係話，無論即樣抽，都只會抽中洗頭水！

看到真相嘅家英哥好直接咁話覺得自己比人玩，「我一抽係洗髮水，後來靜雞雞去後面睇，呢份又係洗髮水，嗰份又係洗髮水，擺明裝我，結果有成20幾萬洗頭水，嗰時我已經係光頭。」，最後只好拎住廿幾萬嘅洗頭水返屋企！

其實家英哥之前都好鐘意上綜藝節目，之前得到過最大份嘅獎品係10幾萬嘅名車，不過最後都要自己補錢去換更加實用嘅旅行車～而且因為節目獎品越嚟越少，令到佢而家對綜藝節目嘅感覺「一般」！

講到最搞笑嘅都唔係家英哥呢個經歷，因為大家一見到呢單新聞，就會即刻諗起「獎金獵人」洪天明！洪天明好多年前錄節目贏過2萬件花之戀壽司，直到網民而家都係會恥笑佢！

不過網民都有話：「洗頭水都仲可以用黎洗頭皮，你話如果啲獎品係梳嘅話⋯」、「好過2萬件花之戀啦！」

睇完呢個節目之後，真係覺得光頭嘅家英哥拎住咁多洗頭水返屋企真係有啲慘，不過邊個話光頭唔需要洗頭㗎～～同埋佢仲可以同Lisa姐一齊Share添！

Text：Girls Style Editorial

Photo Source：Viu TV、Whatscap