鄉村風土味求婚！何猷君求婚奚夢瑤被大陸網民嘲笑，網民：有錢人的品味總是這麼一言難盡！

賭王何鴻燊四房兒子何猷君同內地名模奚夢瑤傳拍拖多年，噚日兩人嘅求婚Party終於曝光！不過呢個求婚派對除咗引來香港網民熱烈討論之外，連大陸網民都忍唔住嘲笑呢個Party：「有錢人的品味總是這麼一言難盡！」

為咗娶得美人歸，何猷君專登喺媽媽旗下嘅上海尚嘉中心舉行求婚Party！而且商場亦都全日停業，根據消息人士透露：「清了三層樓，有9萬9千99朵玫瑰，四姨太已經來了兩天在布置呢。」

整個求婚派對嘅主題係「Mario」向「碧姬公主」求婚～網上亦都有唔少網民Po出求婚現場照片，不過唔少網民見到嗰個粉紅色心心拱門，都覺得似係商場活動、商業演出多過似有錢人嘅求婚派對～

直至求婚當晚，女主角奚夢瑤頭戴皇冠，穿著短袖粉紅色短裙出席。最騎呢嘅係奚夢瑤身後嘅4個伴舞，佢地頭戴磨菇帽、身穿鮮艷到不行嘅螢光粉紅色短裙，喺奚夢瑤身後跳舞，成件事真係娘到爆炸⋯⋯

而何猷君仲著住黑色小背心，拎住支結他高唱《活著VIVA》向心愛嘅女朋友求婚，真係搲爆頭都諗唔明究竟係邊個叫佢唱呢隻歌呀～～

網上亦都有網民曝光何猷君送俾奚夢瑤嘅禮物，喺一個LV禮物上面以白色筆寫：「小明（奚夢瑤小名），你覺得咱兩有可能在一起嗎？」網民就話：「LV瞬間變成十元精品店的小禮盒」

不過入面隻鑽戒先係最重要！！

仲有網民笑稱「奚夢瑤其實唔係感動到喊，而係俾何猷君激到喊！」、「有錢人啲審美，窮人表示唔識欣賞」、「真係好似鄉下仔求婚咁」

成個求婚Party都成功登上熱搜！不過佢地亦都懶理網民閒言閒語，甜蜜地喺微博發文：「未來有你，請多關照。」唔少人見到奚夢瑤肚突突都留言恭喜佢地～

成功娶得美人歸嘅猷君發自內心地笑得超開心！真係好期待佢地個婚禮呀！！

Text：GirlStyle Editorial

Photo Source：Weibo