今集睇到好心痛！安仔X池美麗一齊飛甩Bonnie，網民：祈求編劇放過一雙戀人～

《愛回家》一向都深受觀眾歡迎，安仔同Bonnie呢條愛情線一向多波折，估唔到噚晚嗰集竟然拆散安仔同Bonnie呢對苦命鴛鴦，編劇仲要安排池美麗同安仔一Pair，引起網民熱烈迴響：「安邦分手 以後罷睇愛回家！」

Bonnie同安仔一向愛得痴纏，咁啱比一向愛慕安仔嘅美麗見到佢地恩愛樣，加上自己專登去元朗買豬大腸比佢食，就覺得Bonnie根本唔配擁有安仔，只有佢先值得擁有安仔嘅愛！

安仔為咗同朱凌凌一齊打新Game，呃Bonnie話要返Part-time～點知池美麗就同返Bonnie講：「噚日同安仔一齊喺朱凌凌宿舍打機打通宵！」搞到Bonnie勁嬲！

美麗個樣勁要好得戚！！真係睇到眼火爆呀～～

喺安撫Bonnie期間，安仔唔小心爆咗美麗暗戀佢一事，再次激嬲Bonnie！Bonnie仲要入「道德訓練營」幫爸爸手，兩日都收唔到電話！本身安仔都諗住入Camp幫手氹返Bonnie，點知又見到美麗！

面對美麗痴漢式追求，安仔堅決Say NO！但係美麗都堅持要同佢玩緣分遊戲，如果一分鐘之內，美麗搵到安仔的話，就證明佢地有緣分～

安仔藏身於學校後面山坡下嘅隱蔽保安室，點知喺最後一秒真係比美麗搵到安仔！！不過下一秒就因為惡劣天氣造成山泥傾瀉，令到佢地兩個被困保安室！

好彩美麗隨身攜帶零食，一向為食嘅美麗竟然犧牲自己，比哂所有嘢食比安仔，因為佢想「將所有嘢比哂自己鐘意嘅人」，絕對係患難見真情！

最後兩人成功獲救，不過安仔已經唔再重視Bonnie，一聽到美麗醒返，即刻跑去佢病房拖實佢隻手！令到Bonnie眼濕濕、眼紅紅⋯⋯

唔少網民都話：「喂大佬呀。其實愛回家收視得30點唔係好高架炸，個編劇係咪癡左呀，好搞唔搞安邦呢條線。」、「如果安仔唔要你，我都唔會再睇愛回家」、「安bon唔可以輸 今集睇到勁心痛 心痛bonnie」

不過大家睇還睇，唔好將憤怒嘅情緒上升至演員！事關有網民去埋飾演美麗嘅鍾凱琪IG度留Comment，好彩鍾凱琪EQ夠高，大方得體地回應：「不論戲裏戲外的我，都希望用我的努力，不放棄，肯付出去感動你。終有一日即使曾經負評也能變成正評。」

究竟Bonnie同安仔之後會發展成點呢～～

Text：GirlStyle Editorial

Photo Source：TVB、Instagram