今次真係客串啦！Bobby以「祝枝山」Look亂入愛回家，客串兩集仲要玩埋穿越劇情！

《愛回家之開心速遞》一向都係收視保證，唔少觀眾都好鐘意睇呢種輕鬆小品，放鬆一下返工返學嘅壓力！Isabella「群姐」一向都係歐陽波比嘅忠實粉絲，噚晚歐陽震華就喺社交網站Po咗張同熊家嘅合照，證實客串《愛回家》！唔少網民見到呢張合照都替「群姐」覺得好開心！

喺《愛回家》入面除咗「大小姐送水輝」、「龔水」、「安凌」之外，Isabella「群姐」同歐陽波比呢條線，每次出現都會令大家笑餐死！歐陽震華噚晚Po嘅相入面，以一身《金裝四大才子》入面嘅「祝枝山」造型登場，唔少網民都勁期待佢同「群姐」會有對手戲！

歐陽震華仲喺張相下面留言話：「為何『祝枝山』會出現在《愛回家》？謎底即將解開...」歐陽震華接受媒體訪問時亦都證實自己會客串《愛回家》，因為知道群姐係自己嘅忠實Fans，所以就向無線高層曾勵珍自薦～但奇就奇在呢張大合照竟然冇「群姐」份，唔通「群姐」匿埋喺枱底？

而且今次仲會客串兩集，劇情亦都有穿越情節，真係聽到都已經好期待呢集嘅播出！其實《愛回家》之前亦都有唔少明星幫手客串，好似冇耐之前古巨基以外賣仔角色登場，被稱為「最多對白嘅外賣仔」、由盧宛茵飾演尖酸刻薄嘅崔Auntie等等～

「群姐」喺劇集入面開口埋口都係歐陽波比，好似之前就曾經為咗歐陽波比見面會門票，爭啲比人炒魷魚！其實今次亦都唔係「群姐」同歐陽震華第一次合作，早前佢地兩個被某個商場邀請一齊為母親節拍廣告！

早前「群姐」被問到幾時先可以見到佢地喺《愛回家》相聚，佢當時就大賣關子，估唔到今次由歐陽震華公開消息！相信各位《愛回家》Fans都好期待啦～

Text：GirlStyle Editorial

Photo Source：Facebook、Instagram