澤囝一雪前恥！黃宗澤再演繹《K歌之王》獲網民大讚，網：「香港樂壇欠黃宗澤一個交代！」
唔少網民一講起黃宗澤就會諗起佢唱《K歌之王》嘅歌聲，原來不經不覺已經10年！黃宗澤俾網民恥笑足10年，估唔到佢竟然重返樂壇，第一隻歌就係改編《K歌之王》嘅《發夢之王》，道出10年以來追逐唱歌之夢嘅經歷！估唔到隻歌推出之後，網民都大讚澤囝功大有進步！
2009年嘅勁歌金曲頒獎禮，黃宗澤被選中同陳奕迅Eason合唱《K歌之王》，多次走音而被網民瘋狂恥笑！今次Bosco派發全新改編單曲《發夢之王》，歌詞講述佢追夢心境歷程，自抽之餘亦不忘帶出重點，希望大家唔好忘記自己嘅夢想！
歌詞幾乎每一句都係自嘲自己唱歌難聽：「觀眾叫澤仔聲帶切除 盡快處理」、「人人亦知我 低兩個KEY似足講對白」、「人人亦知我 聲線太差唱腔不夠滑」，而小編覺得最感人嘅就係最後一句：「我咁都肯唱現場 你話我傻 誰試過挑戰自己都明白 傻嘅唔係我」
MV入面以瘋人院為背景，而澤囝就係「發夢歌神」，因為一次演唱失手而被網民欺凌踐踏夢想，裡面仲講述社會上唔同領域嘅追夢者，點樣受盡他人嘅冷嘲熱諷，但仍然堅持理想，以「眾人恥笑，我續追」嘅精神成功追夢！
不過唔少網民睇完呢個MV之後，都覺得澤囝嘅唱功已經比之前好咗好多！而且呢個MV非常有意義，唔少藝人都喺Bosco IG下面留言支持佢！例如最近一齊合作嘅Kenny關智斌：「唔係笑片嚟嘅？點解會睇到touching 到想喊㗎！ good job 波波」，翠如、Joey同埋欣宜都有留言讚澤囝～
雖然呢一隻只係澤囝為咗廣告而推出嘅單曲，但係佢亦都好認真地喺唔少串流平台上架！唔少網民聽完都搞笑地表示：「香港樂壇有救啦！」、「香港樂壇真係欠澤囝一個交代」
Text：GirlStyle Editorial
Photo Source：YouTube、Bosco INS
❣️ 立即 Follow 我們的 Instagram girlstyle.mag
✨GirlStyle 女生日常手機應用程式正式登陸 App Store 及 Google Play✨ 👉 立即下載
