「警民關係已經無可挽回」！杜汶澤以《我居然叫人唔好鬧人》為題撰千文字：「留有用之身，做要做的事」

近月的反逃犯條例抗爭，引發了一連串的社會衝突，令到不少香港人都痛心疾首！有見及此，杜汶澤昨（2/10）就以《我居然叫人唔好鬧人》為題，打了千字文望大家「不要再近距離以言語挑釁警察」，並抒發了個人感受，感性表示：「留有用之身，做要做的事。老人家心痛你哋，一時感觸多口了，請年輕人恕罪」

杜汶澤先表示以下的言論是真心望大家好，稱反逃犯條例抗爭已發生了接近四個月，警民關係已經無可挽回，更指現時很多衝突與抗爭未必有直接關係，純粹是仇人見面：「唔緊要，我知道大家冇可能原諒香港警察，我絕對理解，但係你哋要明白到，你哋面對嘅究竟係一種咩物種。」

杜汶澤更點出了「道不同，不相為謀」的道理，因為大家都是完全不一樣的人，已不可能要求對方能理解你：「每一次我見到有啲好心市民，響前線同警察講道理，我自己都會搖頭嘆息。唉，同佢講都嘥口水」

他又表示警隊存在著3類人，其一就是極少數出於正義而選擇當差，但是入行後才發現：「其實都只不過係個擦鞋仔集團，擦鞋越叻就越升得快，咩正義感都消磨晒啦！」也因此他們較易想法變得負面、爛賭，甚至作奸犯科：「君不見警察犯罪個案有如天上繁星？」

第二種就是因求學時期經常被欺凌、比人打，自己沒有靠山，所以畢咗業去考警察，但就形容這類人一般被暴力對待過，相對暴力傾向都特別嚴重；第三種就是純粹為打份工：「呢班人同工廠入邊嘅機器、或者黨鐵入邊嘅入閘機基本上冇乜分別。上級叫你做乜你咪做乜囉，根本冇個人意志可言。」

「俾呢三種人揸住武器，係幾恐怖一件事。何必要得罪呢啲咁嘅人呢？」更認為大家對於警察的觀念多是來自小時候看電視劇或電影:「我可以好負責任咁話俾大家知，呢啲全部都係角色嚟，係編劇寫出嚟，如果寫得唔好，梁朝偉都唔會接啦！」

在提及警察的禮貌方面，著大家還是別太認真：「好多高級警務人員，當面對市民嘅時候，除咗冇禮貌之外，仲有一副高高在上嘅樣，因為日日響差館俾人擦鞋，接觸市民機會唔係真係咁多，當遇見市民嘅時候，好容易會誤會對方係佢自己下屬，再加上自己膊頭有花，自不然覺得自己響職場上有啲成就，個人囂張啲都係好合理。其實咪搵得嗰十雞八雞個月，嚇死人咩想。」

最後杜汶澤希望大家明白：「今時今日有極權撐腰嘅香港警察，可以講得上係為所欲為，你頂撞佢，輕則佢會罵你，用胡椒噴霧射你，重則開槍打你，打你唔死拉埋你。完全係唔需要負上任何責任！」

「留有用之身，做要做的事。老人家心痛你哋，一時感觸多口了，請年輕人恕罪。」有粉絲看後留言稱：「 只要明白拳頭在近，無必要呈口舌之快，記住十年未晚。」、「可唔可以用『惡人先告狀』嚟形容佢哋依家嘅行為？因為驚死就兇咗你先咁呢？」、「聽澤一夕話，勝讀十年書」、「睇完明白理解咗好多依款生物嘅特徵」

Text: GirlStyle editorial 

Photo Source: Facebook@杜汶澤