【林作鍾培生拳賽】門票最貴近3萬？斥6位數請麥明詩做嘉賓，側田、LMF、陳嘉倩助陣

Trendy 人氣熱話

By Helen on 24 Mar 2021

Senior Editor

唇膏控＋貓奴，熱愛日韓妝

林作和鍾培生的拳賽「林鍾一戰」將會於9月18日九展Star Hall舉行，據知側田和樂隊LMF會做嘉賓，門票最貴更索價近3萬，林作則暗寸：「三萬蚊一張飛，我估得你老豆會買」！

富三代鍾培生與林作的「百萬擂台戰」更多詳情已經落實，拳賽9月18日選址九龍灣國際展覽中心Star Hall舉行，因應社交距離措施，預計會開放1800個座位，門票價錢由1200元至最貴近3萬元！

當日除了拳賽還會有表演項目，鍾培生曾透露會有樂隊、歌手、YouTuber和來自TVB和ViuTV的司儀參與，還有多位靚女Ring Girl助陣。據知歌手側田及樂隊LMF已獲邀擔任演出嘉賓，而前主播陳嘉倩也可能於現場報導。

【GirlStyle Club 會員專享新禮遇】做會員儲積分可免費換美妝好物

鍾培生還有意邀請林作前度女友麥明詩出席，更願意給予高達六位數字，希望藉著這對過氣戀人增加拳賽的話題性，未知麥明詩會否答應呢？

不過拳賽票價高達三萬元，林作則出Post暗寸：「三萬蚊一張飛，我估得你老豆會買。我媽媽應該會喺場外等接個仔放工。」

網民也回應表示：「憑咩呀你哋？30蚊都唔睇」、「貼錢都未必睇！你送飛俾我我都考慮睇唔睇」、「畀三萬睇2條麻甩佬？」、「World Cup 都唔駛咁貴」、「有錢都捐去做善事啦！」

Text：Girls editorial
Photo Source：鍾培生、林作facebook，麥明詩、側田、陳嘉倩IG

「林鍾一戰」拳賽細節

連日來讓大眾吃盡花生的林作鍾培生口水戰，日前終於將網上口水戰搬到現實，正式舉行記者會落實比賽日期。「林鍾一戰」記者會在3月6日星期六於鍾培生位於淺水灣的豪宅舉行，一出場已經霸氣十足的鍾培生佔盡主場之利，幾乎沒有正面望過林作一眼。

這場「林鍾」拳賽暫定於9月中舉行，到時會有四至六場拳賽，不單止有林作與鍾培生，還會有亞洲職業拳王級選手、網絡紅人、top band等演出，而這場拳賽將會以售票形式發售。

【GirlStyle Club送妳】RMK 皇牌底妝旅行套裝輕鬆打造通透底妝

口水戰對答口才滿分顯EQ

在定在九月的拳賽舉行前，二人就先在記者會展開了一場賽前口水戰，在對話中鍾培生多次沉不住氣打斷林作發言，又指著對方大罵對方是「piece of s**t」，火藥味十足。相林作面對著鍾培生的咄咄逼人仍然非常淡定，多次的幽默對答就被網民大讚EQ十足而且充滿笑點，一起來看看他們的對答精華節錄吧！

林：嗱，講一句公道說話，多謝鍾生舉辦呢場賽事。呢100萬對我嚟講係好重要嘅，對一般人嚟講可能呢100萬唔算得係乜，但係100萬呢，例如係已經可以醫到一個大病，所以呢100萬呢，絕對係我旁身嘅一大好重要嘅嘢。
鍾：醫返你個腦啊。

林：信心有嘅，做嘢好少無信心嘅，我好有信心。老實講，多謝鍾生俾到足夠時間去練，你話聽日打，要奉獻出一場精彩賽事不敢保證，但係你俾到時間我set係9月中呢，咁9月中呢林作就會係不同嘅人啦，好無啊，到時就會變成一個拳手，
鍾：piece of s**t ！piece of s**t ！

林：到時我就周街挑機啦，可以賺唔止100萬，可能成千萬
鍾：其實你一文不值囉，你無我你係一文不值囉，係我去比錢定到你嘅價位囉，無我你係一文都不值囉。
林：我仲有我啊媽嘅，我啊媽無你啊爸咁有錢姐，都有少少架大佬～係咪先～
鍾：S**t...

記者問鍾：Derek兩分鐘會唔會太多啊？你覺得你需要幾耐可以擊敗啊Jo（林作）啊？
鍾：如果我真係認真打呢，10秒就KO佢架了。但我成日都講，as i said，I will hurt him，I will humiliate him and I will f**king break him。

記者問鍾：有會員想問Derek怕唔怕打死林作？
鍾：佢有向師傅同佢操應該唔會死嘅，我本來諗住想搵殯儀館嘅sponsor，但我相信輪椅會好少少囉。

林：佢個培生培心啲會員...有漢奸（笑）呢幾日有啲話係佢會員但係佢撐我。
鍾：收X啦你無人撐你啊。

林：市面上好多人都係撐我，好多謝大家。
鍾：我真係想問呢，我代啲記者問下啦，你啲自信邊度嚟架？you piece of s**t你會唔會照鏡嘅時候好蒙羞啊覺得自己？
林：我嘅成就就係唔需要啲咩成就都可以坐喺度。

鍾：咁我覺得有樣嘢係真嘅，既係全香港得兩個人係會值得7位數字甚至8位數字比人打嘅，其中一個坐係我隔離囉。
林：另外個個係邊個啊？
鍾：..........

林：總之呢個係榮幸，我希望我嘅存在俾到香港好多普普通通嘅男士們，甚至女士們聽，我可以，你地都得，或許我地不能做富三代。
記者：可唔可以講清楚你係咪話你比人打得嘅時候人人都可以比人打嘅意思啊？
林：人人都可以俾人打，無錯，同人打交隻抽係我哋嘅自由，只不過出場費你要計清楚，俾100萬，打硬，10萬就未必。

鍾：即係好簡單，佢嘅人生啦，讀咁多書做咁多嘢都好，就係佢今日可以就坐喺我隔離囉，that’s all，即係天生我材必有用，而佢嘅價值就係俾人打囉。
林：所以讀多啲書，如果係成功嘅，你做到才子嘅都可以同我一樣有呢個身價，勵志嘅我覺得呢個故事。

記者問林：點解你會覺得你係讀得多書所以佢先想打你呢？
林：我覺得如果我係個普通人佢無咩興趣嘅，啱唔啱啊？佢都唔會日日周圍同人講話佢要用100萬打你啦，係米先。咁佢咁睇得起我，絕對係我榮幸啦。

林：其實各位，都想講應該我人生最大嘅成就就係今日呢一刻，如果人生林作係2021年3月5號係無成就，今日有啦，多謝（爆笑）。

記者問鍾：Derek你驚唔驚林作爆陰毒襲擊你嘅重要部位？
鍾：呢幾位記者朋友你哋zoom近啲佢個樣，你覺得呢pat屎可以做到啲咩出嚟？呢pat屎有無機會喺台上面，即係佢用任何陰招我咪揼爆佢，你zoom近啲佢個樣。And look at me I’m f**king champ！

網民風向大轉

經過呢一場賽前口水戰後，竟有不少網民表示對林作另眼相看，認為他對比起鍾培生顯得相當高情商，會自嘲之餘亦非常幽默，處之泰然的態度與鍾培生火氣十足的感覺非常大對比。就連原先支持鍾培生的部份網民都表示記者會後對鍾培生減分不少：「雖然對林作先生冇咩好感，但林生在記者會表現有風度，講野有深度，總好過個位有錢先生講黎講去都係個兩句英文粗口，粗口用詞都咁貧乏，真係窮得只剩下錢。」