趙善恆長文自揭患抑鬱一年「爭啲想走」，去年經歷分手與喪父之痛：我冇死到已經好好彩

樂隊ToNick的主唱趙善恆（恆仔）在去年2月突然宣布與拍拖十年的女友譚杏藍（小花）分手，其後在4月又透露爸爸因血癌離世。今日他於IG貼出黑圖，並自揭雙重打擊讓他患上抑鬱症，不少圈中好友和網民為他送上慰問。

去年經歷失戀與喪父之痛患抑鬱

ToNick的主唱趙善恆（恆仔）去年2月與拍拖十年的譚杏藍（小花）分手，並表示兩人仍是朋友，之後4月又經歷喪父之痛，父親在醫院彌留之時，他忍痛照常參與「蒲吧春季音樂祭 2023」的演出，並以直播方式讓父親看他在台上表演，完場後馬上趕到醫院見最後一面。

趙善恆在一年內經歷兩件大事，心情難免非常悲痛，他今日凌晨在IG貼出黑圖，長文抒發感受，其中更自揭患上抑鬱症，指自己「抑鬱咗一年，爭啲想走」，還稱很怕自己會做傻事，最後他指自己用了一年的時間來調整心情，亦透露現時已有新戀情，希望大家讓他好好過生活。

恆仔：其實我抑鬱咗一年，爭啲想走

趙善恆以長文寫上：「有啲嘢好想講，因為我怕我真係會做傻事，我只會講一次，都唔會再回應。話說，啱先有個「朋友」走埋來同我打招呼，咁我客氣咁寒暄咗幾句就算，但同呢位「朋友」對話之後我發現，我真係頂唔順喇。其實我抑鬱咗一年，爭啲想走，感謝跑步真係救咗我好多。上年，我爸爸走咗，亦同一齊好多好多年嘅女朋友分手，分咗手之後，當每一個人關心問我點，佢哋都會不經意咁講一句：原來你乜都唔知㗎？然後我就會聽到一個新嘅人名。我身邊啲同事同埋朋友，之前佢哋唔講畀我聽，係唔想影響我，我仲好似一個小朋友咁樣，鍾意創作，想做好每一件事，又好想做啲好嘢出嚟」。

他續說：「作為幕前，又唔想引起不必要嘅風波，費事影響到啲project同客戶，咁就不斷隱瞞自己情緒，扮正常，繼續發放正能量，然後我用咗一年時間處理我嘅心情。我冇死到，其實已經好好彩，但我唔想再扮喇，我覺得夾band好開心、我覺得拍戲好開心，我而家都開始一段新嘅感情，而家係向建立一個好家庭方向出發，我淨係想好好地生活，做好我嘅工作，有一個好好嘅家庭，好好經營我嘅團隊，係咁多」。

他表示現時只想好好生活：「好少打咁多字，但因為我發現我真係面對唔到呢個情緒，唔想工作唔到、生活唔到，唔想開始唔到一段健康嘅新關係，所以最重要係唔該咁多位關事嘅「朋友」，唔好再走過來同我打招呼。我唔會公開任何人名，只係想你哋知，我唔再係咩都唔知，而家我只想好好生活」。

Text：Girls editorial

Photo Source：趙善恆@IG、譚杏藍@IG