MIRROR舉行見面會分拆12位成員被炮轟！MIRO批公司帶頭玩分化：其實想睇佢哋互動～

By raina on 06 May 2024

Digital Editor

已出道五年的MIRROR將於六月舉行《Hi MIRO！見面祭》，而官方歌迷會還宣布一共舉行12場，其中每位成員會分別出席1場，而每場票價則為780元。消息一出，即引來大批MIRO（MIRROR粉絲）的不滿，質疑「即團粉要買晒12場？」，紛紛衝到留言區炮轟！

MIRROR舉行見面會分開12位成員

最近MIRROR官方歌迷會宣布將於下月舉行《Hi MIRO！見面祭》，讓12位成員跟MIRO見面，一共舉行12場見面會，而每場票價則為780元。但今次見面會與以往不同的是，每位成員只會在指定日期和時間出席其中一場，即12位成員不會一同現身。大會又表示每場不但有30分鐘表演和互動環節，指定MIRROR成員還會向每位MIRO送上御守及祝福，更有團體合照環節，以答謝MIRO對MIRROR的全力應援和守護。

另外，大會再補充今年的粉絲活動將會分為兩部份，另一部分會於年底舉行更大型的見面會，但未知是否屆時會全體現身。

大批MIRO直指公司帶頭玩分化

是次安排引起大批MIRO的強烈不滿，不少人認為分拆12位成員與粉絲有違團魂，並直指公司帶頭玩分化。有人留言：「好心搞返上次嗰形式啦！拆開晒咩玩法」、「如果個別見，點解唔淨係join個別FC？其實公司先係分化主導者」、「Mirror係12個人一齊先叫Mirror，請清楚初心」、「其實入得miro真係想睇12個，一場一個就唔係Mirror啦」、「入Miro個時都係因為12個先入，搞個見面會都要逐個打散，團魂果然係得個講字」、「其實最想睇佢哋互動」等。

質疑是次安排根本是「搶錢」

另外，也有不少人認為每場見面會需交付780元非常昂貴，又只能與偶像見面半小時，質疑團粉要出席全部場次的金額高達九千元以上，炮轟這個安排根本是「搶錢」，有人留言：「想搶錢都唔好咁難睇，$780/30分鐘？仲要拆散12次嚟收？」、「平時就成日sell團魂，而家又分拆12個仔去搶錢」、「30分鐘$780當我地水魚…？」」、「之前衝票房就叫團魂，而家為搵錢要拆開12個人12場，搵錢至上，呢間公司都唔係有心搞好個團，目光短視，只識當fans水魚、提款機」等。