香港樂壇其實仲有救！5個應該要紅嘅歌手，你最想推邊個上紅館？

好多人話香港樂壇冇得救，其實絕對唔係！除了已經上哂神枱，年年頒獎典禮都攞獎嗰幾個天王天后之外，其實仲有好多值得被留意嘅滄海遺珠！其實以下呢５個歌手，真係諗唔到有咩理由唔紅！

1. 陳柏宇

被網民同傳媒譽為「隱世高手」嘅柏宇BB，其實係06年出道架！由瘦瘦削削嘅白臉書生型，行到今日超MAN嘅肌肉猛男，唯一冇變過嘅就係佢把靚聲！

其實出道嗰排嘅《I Miss You》、《逸後》、《你暪我暪》都唱到街知巷聞，不過其實Jason中間都經歷過一後低潮期，更試過係頒獎典禮坐冷板凳！

不過柏宇BB不負眾望，近年終於憑住《沒有你，我甚麼都不是》成功彈出！其實柏宇把聲真係可以用靚到抽筋形容，快啲攞男歌手啦好嗎！

2. 衛蘭

原本只係幫黎明做和音嘅衛蘭原來係比雷頌德發掘成為歌手！一出道就憑住獨特嘅唱腔，以《大哥》、《心亂如麻》、《離家出走》等成為冒起得最快嘅實力派女歌手～

其實星途應該一遍光明，不過因為妹妹衛詩涉嫌藏毒，加埋同AMUSIC約滿後嘅休息期，衛蘭就好似係樂壇消失咗一排咁～

其實講唱功同唱腔，Janice真係冇得輸～嗰種咬字鬼鬼地嘅感覺，再夾雜啲R&B嘅唱腔，相信香港樂壇都冇乜邊個女歌手可以匹敵！

3. 周國賢

03出道嘅周國賢其實出咗第一隻同名專輯之後已經吸引到唔少樂迷嘅注意，除咗《目黑》之外，相信90後都一定聽過《告一段落》、《理智與感情》同《地下街》！

但係09年因為要打理家族海味生意而退出咗樂壇，10年回歸樂壇成績唔錯，不過因為13年因受情緒困擾而再度退出樂壇～

憑住又識作曲又唱得嘅才華，仲有周爸爸嘅光環，一早就成為唔少樂迷嘅男神！快啲作多啲好歌比大家聽啦～

4. 方皓文

其實一出道嘅方皓玟都係唱下K歌，係樂壇成績唔算特別好～但自從係台灣打滾完一輪兼換埋新公司之後，成個人形象同歌路都有360度轉變，令人耳目一新！

憑住佢音樂嘅獨特性同埋非主流嘅曲風，反而吸引到一班忠粉！

好多人都欣賞香港終於有其他風格嘅歌曲，而又識作曲又識填詞嘅方皓玟就好似成為咗脫俗ICON咁，闖出一條新血路！

5. 側田

其實側田出道四個月已經係紅館開個唱，成為「一碟上紅館」嘅最佳例子～

當年側田唔少歌都唱到街知巷聞，獨特唱腔再加上大衆化嘅情歌令佢成為炙手可熱嘅新人！不過自從側田懷疑禿頭照曝光之後，11年初宣布暫別香港地區到，中國內地發展～但其實大家都好掛住佢啲情歌！

你又最想推邊個上紅館？

source: Facebook、intagram