邦民女要嫁人喇！27歲陳嘉寶同35歲半億「財」俊宣佈結婚，兩人甜蜜表示準備好步入人生另一個階段！

今日下午，27歲邦民女Anjaylia陳嘉寶係Instagram宣佈要結婚啦，並且已經確定將於今年嘅11月25號為大婚日子呀！形象一直清純可愛，繼「邦民女」廣告後為人所熟悉嘅Anjaylia，後來係TVB劇集《女人俱樂部》飾演少女版小詩一角立即人氣急升，非常有觀眾緣～而家仲宣佈埋結婚，唔知會唔會令到一眾男粉絲心碎呢？

24歲先第一次拍拖嘅Anjaylia，而Epaphras就係佢人生中嘅第一段愛情，兩人當初係教會上相遇、相識、相知、相愛，到今日已經超過咗四個年頭喇！而金融「財」俊嘅男友Epaphras就坐擁半億身家，絕對係年青有為！

大婚之日就定為11月25號，Anjaylia已經一早叫定親朋好友預留日子啦～

「今天，很高興的跟大家宣布我們已經準備好要步入人生中的另一個階段了～」雖然人生將會走去新嘅一頁，但Anjaylia仍會係工作上繼續努力，為自己夢想好好奮鬥！

Anjaylia一直都有努力工作，係幕前都有嘗試過唔同嘅演出，除咗《女人俱樂部》飾少女版小詩，仲有近年係《殭》飾演嘅何月，而家仲拍攝緊《誇世代》，相信粉絲們都期待緊佢嘅最新電視作品～

除咗拍電視劇，Anjaylia都會不時出現係大螢幕上，如《人約離婚後》、《紀念日》、《沒女神探》都係做第二主角～

其實一直蜜運中嘅Anjaylia不時都會係Instagram上發放閃光彈，經常post出甜蜜嘅相片，簡直係羨剎旁人呀！

而家Anjaylia同男朋友Epaphras都為大日子作好準備，更向各位嘅祝福表示謝意！

相信一眾粉絲都會好好期待Anjaylia嘅大婚日子㗎！

Source: Instgram@anjaylia/@epaphras/weddinghk