TVB捱足8年成功入屋！《不懂撒嬌》Saving王浩信榮升暖男男神，你最鍾意佢邊個角色？

雖然《不懂撒嬌的女人》啱啱先播出一個禮拜，除咗聽4K實景拍攝聽到識背之外，劇中王浩信飾演嘅暖男Saving亦都大熱跑出，甚至畀強勢回歸嘅宣萱同林文龍更出位，成功冧死唔少少女心同師奶！係TVB捱足8年，王浩信由《EU超時任務》「渠頭」走到《不懂撒嬌》Saving成功由歌壇轉戰拍劇入屋，你又最鍾意佢演邊個角色？

王浩信Saving呢個角色設定可以話係極討好，高大靚仔、有義氣得嚟又暖男、生鬼搞笑、麻甩得嚟又好MAN，有觀眾仲話係Saving身上睇到「渠頭」嘅影子！

噚晚嗰集講到王浩信阿姨話「對住自己鍾意嘅人就自然識撒嬌架啦」，而Cherry終於都肯學點撒嬌，亦都成功同王浩信撒嬌！sweet到漏～

出動埋因為怕Cherry曬親所以靜靜擋住太陽呢一招，雖然明知離地又誇張，不過個對象係靚仔又有型嘅王浩信，少女有咩辦法唔心動～（心心眼）

Saving亦都同Cherry表示自己對佢有好感所以先出走，因為覺得自己結唔到婚，畀唔到幸福佢～

呢隻強勁嘅臂彎配上討好性格，男神package完全爆分！

相信大家都好期待 Saving 同 Cherry 之後嘅感情線，而王浩信自己都話今次 Saving 同 Cherry 嘅故事甚至比《EU》更多喊位，叫大家一定要密切留意咁話！

回顧返王浩信呢幾年嘅演出的確令人眼前一亮！舊年《EU超時任務》有鄉音嘅「渠頭」演得入型入格又冇包袱，最後拎唔到「最受歡迎男角色」好多觀眾都戥佢唔抵！

好多人都好鍾意佢同千雪BB呢一對，真心正！

邊有咁靚仔嘅圍村佬架！

仲有致命復活入面嘅康成哲阿Max，雖然冇對上兩個角色咁多發揮，不過都一樣咁好睇！

大台今次冇捧錯人，因為Signal Wong真係好正啊！希望以後會多啲見到佢演唔同嘅角色啦～大家又最鍾意佢演邊個角色呢？

source: tvb.com、instagram