幻覺嚟啫嚇我唔到嘅！《不懂撒嬌》破天荒學美劇玩第二季，第一季仲有兩日就完？

有睇開美劇嘅觀眾都知，佢地好鍾意以季度做單位，成日都玩SEASON幾SEASON幾吊住觀眾癮！原來今次全城熱播嘅《不懂撒嬌的女人》除咗有破天荒4K實景拍攝之外，仲破天荒學埋美劇玩第二季！

吓，第一季兩日後（14號）就完？Cherry同Saving啱啱先一齊咗炸喎！我唔信！

唔係標題黨扼大家入嚟睇，而係《不懂撒嬌》編審朱鏡祺自己講㗎！朱鏡祺話第一季會係第14集（14號播出）完結，相信聽到嘅人都會一頭霧水，咁第二季究竟拍咗未？幾時播啊？

平時美劇下一季分分鐘等半年，不過TVB話明今次係破天荒當然零舍唔同啦！因為《不懂撒嬌》第二季原來就係第15集開始.....唔好反枱住，朱鏡祺話加入季度概念絕對唔係扼嬲，而係想劇情更加緊湊吸多啲後生觀眾咁話！

真係嚇到Saving眼都反埋，心都離一離，好彩仲有得晚晚睇Saving！咁究竟第二季係點玩法先？

其實《不懂撒嬌》總共就有28集，不過編審就特登將頭20集嘅劇情濃縮到14集，換言之劇情就好似快左一半咁！而朱鏡祺話大家睇第14集亦都會有種大團圓結局嘅感覺，但係好戲再後頭，第15集又會開始一個時空完全唔同嘅故事發展咁話～

佢仲話頭14集嘅時空係壓縮咗，大家可以當頭14集係幾個月內發生嘅事，而15集打後就係幾年後嘅事咁樣理解～

嗱！講到咁精心舖排同製作，真係搞到人好期待第15集之後嘅發展！不過希望第14集嘅結局唔好係BBQ嗰啲行嘢嚟hea觀眾啦～

source: weibo、instagram