粉絲都認唔出偶像？Chok峯《大潑猴》最新馬騮造型曝光：「感覺自己每日都係度演神經病」

曾經係tvb當紅嘅小生林峯相信冇人會唔記得佢嘅招牌Chok樣，因為當時飾演《溏心風暴》系列嘅佢，令佢人氣更加急升，除咗拍電視劇，仲做埋歌手，實行雙棲發展～最近忙緊拍攝內地劇集《大潑猴》，飾演主角馬騮仔嘅造型第一次曝光，不過一眾粉絲都表示認唔到偶像呀～

平日都係以靚仔造型現身嘅林峯，粉絲每次見到佢個Chok樣，都會忍唔住瘋狂尖叫！不過唔知見到佢係《大潑猴》飾演嘅馬騮造型會有咩反應呢？

早前粉絲就好貼心咁帶咗零食同水果嚟到《大潑猴》嘅片場探林峯班，眼見哩位著咗綠色長袍同磚紅色外套，身上貼滿猴毛嘅樣，就咁睇都真係好難認得出係林峯！難怪粉絲第一眼睇見時都呆咗～

因為而家正值夏季，所以係拍攝時基本上都係得30幾度，而身上著咗三層衫、重達10公斤戲服，仲要貼滿馬騮毛嘅林峯都熱到全程要拎住風扇吹！

係拍攝期間，演技成熟嘅林峯已經唔再係得個Chok樣，反而非常融入角色，用搞怪嘅語氣加誇張嘅肢體動作演繹出馬騮仔嘅個性，都真係演得幾七情上面㗎！

雖然係相入面睇，都覺得林峰將馬騮嘅人物性格展現得非常好，不過佢就笑言：「感覺自己每日都係度演神經病！」

而今次造型就已經要用4個鐘去化哩個特技妝效，不過現場工作人員就話哩個只係早期嘅馬騮造型，到咗後期，馬騮角色變得更兇殘時，上妝嘅程序同特技都會更加複雜！

林峰就話哩個角色同以往嘅孫悟空唔同，「佢唔係齊天大聖，亦唔係孫悟空，就只係猴子，比所有你哋之前見過嘅猴子更黑暗、更殘暴，哩個可能就係哩隻猴子同之前所有西遊題材裡嘅猴子所唔同嘅地方。」

擁有Chok峯之稱嘅林峯拍劇時都當然不忘chok下樣，俘虜下粉絲嘅心啦～

比起張衛健所飾演嘅經典角色孫悟空，唔知你哋又會鍾意邊個多啲呢？（笑）

Source: Weibo/TVB.com/tvb screen cap