標清睇到眼痛！《蘭花刼》5個凍齡女角10年前後大比拼，邊個先係真正凍齡女神？

《蘭花刼》啱啱播咗幾集，雖然十年倉底加標清貨仔唔少網民表示睇到眼痛又頭暈，不過全靠幾個戲精演員撐住，所以大家對劇情同演技都勉強收貨！不過講到最養眼嘅就當然係咁多位好似食咗防腐劑唔識老嘅女藝人啦！

# 唐寧 35歲

噚晚大家期待已久嘅唐寧終於以教化官身份仙氣登場！拍《蘭花刼》嗰陣唐寧先得嗰25歲炸！

如果要係唐寧身上找10年前後嘅不同，我真係搵唔到啊～

雖然10年後已經成為咗人妻兼人母，不過唐寧個樣依然都係咁sweet甜到漏，你話佢係90後小編都信啊！

其實唐寧由童星出道嗰陣已經仙氣十足，眼大大面型又靚，但係就冇好似其他童星咁愈大愈崩壞，個樣完全冇變過！

所以話唐寧係歷代最靚嘅童星都絕對唔誇張！

# 田蕊妮 40歲

第二位都係食咗防腐劑嘅阿田，雖然就行開實力路線，不過都一樣KEEP得好好！

唔知WOW咗未，原來《蘭花刼》係阿田由亞視過檔大台後拍嘅第一套劇嚟！

兩大凍齡女神為拍PROMO再聚頭，真係而加再拍多次《蘭花刼》剪接返都完全睇唔出歲月痕跡啊～

# 蘇玉華 49歲

原來阿蘇已經就嚟5字頭，真係唔講唔知啊！明明啲皮膚都仲係吹彈可破啊～

除咗有少少發福之外，阿蘇無論各方面都仲keep得唔錯！而且仲愈來愈有女人味啊～

# 胡定欣 35歲

十年人事幾番新～當年仲做緊配角嘅胡定欣十年後已經係視后級人馬！

雖然當年冇高清妝，不過胡定欣狀態就愈來愈勇！

除咗身材愈來愈fit之外，比起當初青澀嘅樣貌，而加已經盡顯大台一姐嘅風範～

# 陳自瑤 35歲

呢排saving哥人氣急升，連帶老婆YOYO都成為傳媒嘅焦點～雖然10年後已經結埋婚生埋女，不過個樣都完成冇變過！

人妻嚟講，YOYO都真係算世界級！

唔會話係《蘭花刼》丫，就算同《四葉草》嗰陣都唔係話有好大分別！

雖然套劇擺咗成十年，不過咁多位女藝人都真係冇變過咁滯，怪唔知大台夠膽拎返出嚟播啦！（笑）咁多個凍齡女角，你又覺得邊個最靚？

source: tvb、weibo、instagram