【賽後報告】 (上) -台東Liv Irongirl 初5150
亦都係因為咁,所以先重拾相機,佢每一場比賽,我就跟去影相,總好過響度乾曬麻~
影多幾場之後,好有衝動想玩埋一份,而且同自己講,學識游水,就算跌左落海,都唔會響度等死麻~好,於是上年嘅5月,終於扚起心肝去學游水!
同年10月,我報左我第一個三鐵比賽–ASTC繽紛組,成件事一d都唔繽紛,深水出發,浪大水濁,一落水就上返救生艇……真心驚到喊….
上年10月ASTC第一個被拾返上救生艇嘅參加者…姐係我…
不過唔知邊度黎嘅膽,咁樣浸完,都仲係要玩,繼續練習練習練習,比賽前嘅兩星期,先真正游到個1500,仲要游成45分鐘,但係都總算追到cut off嘅~
終於都到左比賽日,緊張過玩100公里,成晚輾轉反側,鬧鐘無響,都自己識彈起身,Finally Check Gear之後,就出發去起點~
三項鐵人的裝備
轉項區人頭湧湧,所有參賽者都紛紛準備自己嘅轉項物資,台灣地方的確大,連轉項區都特別大,我可以鬆鬆動動咁set好自己嘅野,跑鞋、帽、號碼布….再一次點清楚有冇野漏,嗯….應該冇啦,出發去拎晶片,然後行去起點
等待係會令人緊張嘅,左行右行,唔知自己去邊,又唔知一陣會面對咩問題,只係望住個浮泡長嘆:「咁……遠…..嫁……」
準備上線,肴底中…
上線嘅位置係一個樓梯位,所有人企曬響度,準備出發,心裡面不斷驚驚驚驚驚,「3、2、1、Go!」,ar…..點算丫,真係要游啦….
驚到捉實條柱…
一落水,我即刻游埋岸邊,游左幾步,就撞左前面嘅魚標,游多幾步,就俾人㩒落水,又係咁打腳,好驚丫…企左上石壆休息左陣,有把聲就同我講「再唔游就追唔到cut off la!」
唯有硬著頭皮繼續游,游到300米左右,終於少d人,望一望轉灣位浮標,見仲有好遠,於是就望著石壆條邊,跟著呢個方向游,全程冇再定位,咁就出事啦….
當大家準備轉灣嘅時候,我仲係游緊直線….
回程大致上都好順利,都仲勾到少少水,原來前面有人跟,感覺係冇咁辛苦,見到最後一個白色泡,真心想喊,ar….我終於到啦,我終於捱過左啦!
Swim: 00:42:45
上左水就係王道!腳踏實地嘅感覺真係好,上水第一件事係除泳帽同泳鏡!因為通常呢個位真係好多相機
上水第一時間係除Wetsuit
然後拼命除錶同wet suit,跑去轉項區,哈~感覺仲好有力,帶好頭盔同鏡,著埋lock鞋,就衝出去上車區~
上車嘅感覺真好,覺得成個人返返黎,由於我上水遲,所以勁人都已經走曬,一上天橋,就可以輕鬆地超車,感覺超爽YY~
但係都怕自己會爆,唔敢去到盡,所以先有咁多輕鬆mode嘅相,直至回頭,遇到兩個差唔多pacing嘅女仔,大家keep住互相超車,帶快左個pacing,輕鬆地keep住AV30衝返終點,超爽~
比賽前其實都未決定係唔係真係要車上除鞋,不過既然練左,又冇理由唔試下嫁,距離轉項區500米,我已經開始除定鞋,嘗試雙腳企同一邊咁落車~細個嘅時候,我真係覺得呢個動作好型,不過個時練極都平衝唔到,直至上幾星期響停車場練,先稍為捉到個感覺,估唔到今次可以好順利咁跳落車~Yes~
我好留意到落車個個位係有攝影師嫁,超想搵返個幅相,因為個個moment,我真係暗地裡由心興奮左出黎~唔知會係一個咩樣呢~
Bike: 1:22:58
落地換鞋,飲杯可樂就繼續旅程,黎到最後一項,當然希望跑盡佢,而且要爭取太陽未曬嘅時候,盡可能跑多d,第一圈感覺良好,跑嘅速度唔快,但起碼仲跑到,第二圈開始太陽越黎越猛,補給站開始派冰,一手拎起,敷一敷額頭同頸,然後就成包冰攝入件衫度,真係好熱,包冰陪我跑左半個圈,就已經溶曬…
天氣太熱,攝左包冰入件衫度
feel到自己速度減慢左,但係都未敢加力,好驚之後跌得仲快,望著隻錶,一分一秒咁過去,本來taget55分完10K,45分仲係8K位,唉…心裡面好急,我同自己講,唔好急,望到分叉位就衝埋佢啦,我記得仲有段距離先到終點嘅,去到用衝100嘅速度啦!
果然我仲有力衝埋個尾佢,不過記錯路,原來分叉位轉多個彎就到終點,冇左個段出loop後嘅一段路,遲左發力…但係都總算under60完成,做返平時嘅水準…
Run: 59:43
完成後,即刻攤響終點,終於完成啦
第一次嘅5150,就係咁完成,算係對自己有個交代,好快就返文旅沖個涼,訓個靚覺,就要出去準備第二日賽事嘅Bike Check in la~
Iron girl 嘅完成牌&完賽背心
(待續……)