網民嬲爆話要寄刀片！《愛回家》龔水愛情線又兜圈，龔燁：「原來我唔係可以將你放係第一位既男人」

《愛回家》裡大小姐同送水輝嘅愛情漸趨穩定，編劇們終於肯放過呢一對戀人！不過另一條愛情線就冇咁好彩啦～小編講緊嘅係熊若水同埋龔燁嘅愛情線呀！噚晚播出嘅「龔燁的No.1」虐心到不得了，睇到一班觀眾眼火爆，仲講笑話要寄刀片俾編劇！

噚晚嗰集講到大小姐懷疑龔燁將哈爾濱國際學校嘅設計圖洩露俾大陳，想查出證據！熊若水知道哈爾濱初雪當日Jenny都在場，懷疑龔燁曾經同佢見面，仲覺得自己由頭到尾都俾龔燁玩緊！

龔燁之後同豪仔傾開先知，原來若水喺哈爾濱真係有去赴「初雪之約」！所以之後就係電台同若水解釋同道歉，仲叫若水比個機會佢～～

龔燁第二日就同若水講清楚所有事：「喺哈爾濱當晚，我係真心想同你睇初雪㗎！但係我臨時有事先去唔到！我之後有去返㗎，但你又走咗」

當若水問佢係唔係幫Jenny做間諜時，龔燁就話：「我去哈爾濱係真心想同你兩個人去工幹」

若水想搵一個「真心真誠，凡事以佢為先，放佢喺第一位」嘅男人，仲透過電台向龔燁如果做到嘅話，就可以再俾多次機會俾龔燁！龔燁仲約咗若水同埋屋企人喺星期日見面，諗住向佢當眾表白！聽到呢句以為佢地喺下半集會繼續Sweet落去，點知編劇又嚟個大反轉！

因為去到最後，龔燁冇出現到，令到若水非常失望！見到若水一路食雞一路喊，真係睇到觀眾都忍唔住想一齊流眼淚！

網民嬲爆咁話：「已經唔想睇呢條線，次次都係有誤會然後解開左之後以為一齊到，然後又有個新既誤會出現，次次都係咁，厭唔厭呀？」

由「長腳蟹」品慧儀飾演嘅熊若水其實喺《愛回家》入面真係好慘，首先同「博士」嘅愛情線已經冇咗，到而家有個默默喺身邊守候著自己嘅龔燁都冇埋，令到「長腳蟹」都忍唔住係IG吐心聲：「從博水到龔水，有你們陪著熊若水經歷過來，替若水心痛，我很感恩。希望你們繼續陪伴若水，讓她知道她不孤單」並TAG了#一起等待更好的未來，讓一班觀眾心痛死～～

觀眾也留言表示：「好悲傷，之前好不容易從博水走出來了」、「係咪同編劇有牙齒印？真係由博士個啖委屈氣直到而家龔燁。真係睇到個人想噴火！」、「呢條感情線追到我也累了」其實編劇不一定是虐心才能創造高收視啊！可唔可以俾水水一個好結局啊～～～

Text：Girls Editorial

Photo Source：TVB