自己頂帽自己車！1對1自家設計雙面漁夫帽workshop，保證啱哂自己心水！

漁夫帽可以話係近年最hot嘅Fashion Item之一，無論係走無印風、休閒風或是運動風都好，一襯埋頂漁夫帽成個造型就即刻文青十倍～不過帽就真係唔係頂頂都帶得好睇，有時除了要睇個print之餘，仲要好睇頂帽型係襯唔襯到自己個頭型同面型，所以次次買帽都唔係100%啱心水！不過對帽好有執著嘅你，終於唔洗再煩惱喇～因為而加可以自己設計一頂屬於自己嘅漁夫帽仲一手一腳車埋，保證啱哂自己心水！

其實揀漁夫帽就真係好講運，好多時睇啱左個款，但個頭圍一唔啱就要被逼放棄......頂帽細得滯嘅話帶起上嚟就好似帶緊童裝帽咁；頂帽大過頭成日跌落嚟遮住對眼睇落就好似變態佬，所以如果可以自己DIY嘅話就唔會有呢啲問題發生啦！

可能你會心諗，我連衣車都未掂過點會車到頂帽出嚟啊？放心～～因為呢度係1對1上堂教授，而最多亦都只有3個人為一班，所以導師Yvonne都會好緊貼到每個學員嘅進度！而同坊間嘅漁夫帽相比，呢一款自家製嘅漁夫帽仲係雙面設計，一頂帽可以當兩頂帽咁帶，正啊！

Photo from Presslogic

手殘嘅朋友大可以放心，因為小班教學嘅關係，出錯嘅機會近乎係零！就算真係有咩出錯都好，導師Yvonne都會係隔離睇到實一實～

Photo from Presslogic

而且呢間工作室，除咗有workshop教車漁夫帽之外，仲有教埋車下tote bag同衫架～好就好在佢仲唔會set死上堂時間同埋款式，學生可以跟返自己schedule同Yvonne約時間就OK架喇，就算收工時間都一樣歡迎！

Photo from Presslogic

講左咁耐，究竟整漁夫帽嘅過程係點樣？唔好懷疑自己對眼，因為只要簡單6個步驟，大約3個鐘頭嘅時間，就可以完完全全DIY出一頂獨一無二嘅DREAM帽喇！

STEP 1：首先揀兩隻自已鍾意嘅布料，你可以自己買定布帶上去又或者直接到工作室揀！導師會幫你裁剪出嚟，再教你沿着紙樣剪裁兩套作布料，一塊FOR底、一塊FOR面布用。

Photo from Presslogic

Presslogic

STEP 2：剪好布料之後，會再剪白色黏朴。記得比紙樣剪細約0.5cm啊～

Photo from Presslogic

暫時都考下你嘅較剪功，所以就唔係話太難handle！

Photo from Presslogic

STEP 3：將加熱熨斗燙放係布料上面，作用係要令到黏朴黏實布料，整完之後製成品就會比較有「型」同埋挺身！

Photo from Presslogic

STEP 4：每頂帽會由三幅布組成，導師會教你用衣車按步驟將布料縫紉。唔識用衣車嘅朋友就唔洗驚，因為導師都會好耐心咁教埋你點用架！

Photo from Presslogic

STEP 5：將兩頂車好嘅帽面對面地縫合埋一齊打造雙面效果，之後就差唔多完成喇～

Photo from Presslogic

STEP 6：最後利用之前留嘅空位將成頂帽反轉，再將空位縫合就大功告成啦！

Photo from Presslogic

好似小編咁整一頂漁夫帽，價錢大概$380，材料費就另計。而唔同嘅布料會有唔同嘅價錢，同埋唔同製成品所需要嘅時間都唔一樣，實際收費可以向工作坊查詢嫁！手作嘅東東就係寧舍有溫度，加上自己親手造，無論係自用或者送比人都係一個好好嘅回憶！

Bear Sewciety 車縫工作坊
報名方法：Facebook Messenger 直接與店主預約
時間： 星期一至六： By appointment/星期日休息
地址：觀塘駿業街51號南達大廈21樓G室
Facebook：Bear Sewciety 車縫工作坊

Text: Girls editorial
Photo Source: Presslogic