同囡囡激似樣！美人胚子郭羨妮公開小一學生相，仲同凍齡71歲媽媽素顏大比拼！

唔知大家仲記唔記得曾經係tvb出演過無數劇集嘅郭羨妮？現年43歲嘅郭羨妮雖然少咗出現螢幕上，但最近就上載咗一張自己小學一年級時嘅入學相同網民分享，好多網民都盛讚小時候嘅郭羨妮就已經係美人胚子，而且仲同囡囡Kylie成個餅印咁樣！

郭羨妮係微博發布咗哩張學生相，仲留言表示：「昨天尋回小學畢業證書，還找到了我小一的入學照，我尖叫了！因為我發現朱小姐長得跟我當年一模一樣！」

就咁睇，髮型同整體輪廓的確同5歲囡囡Kylie有幾分相似，兩個人簡直好似親生姊妹咁呀！相信囡囡長大之後都一定會係絕世美女～

之前更係微博哂出素顏照，同媽媽加囡囡嚟個老中幼素顏大比拼，現年71歲嘅媽媽係哩個年齡都仲keep得好好，難怪連郭羨妮都願意敗畀佢～

外貌有啲鬼鬼地郭羨妮其實係中英混血兒，當年以選美出身，而且仲係當年實至名歸嘅「雙料冠軍」～

郭羨妮喺1999年以大熱姿態獲得香港小姐競選冠軍，同時更得到「最上鏡小姐」、「國際親善小姐」及「千禧才智小姐」等獎項！而喺2000年，郭羨妮代表香港參選國際華裔小姐競選，同樣得到冠軍，絕對稱得上「雙料冠軍」嘅最美港姐！

因為參選時樣貌有啲似1991年最上鏡小姐嘅樊亦敏，所以當時就被傳媒稱稱讚為「翻版樊亦敏」～

之後順理成章，郭羨妮就入咗大台成為演員，仲受到大台力棒，當時都出演過唔少經典劇集，例如：尋秦記、洛神、天涯俠醫、無名天使3D等等，雖然未必套套都做到女一，但係以郭羨妮嘅絕世美貌，光芒絕對唔輸女一！

到咗2011年，郭羨妮走入咗人生另一個階段，仲同咗中國內地動作導演朱少傑低調結婚，之後係2012年生咗囡囡Kylie，從此就少咗拍劇，多數時間都享受著幸福嘅家庭生活，仲會周不時係微博post幸福家庭照，簡直羨剎旁人！

一家三口嘅化妝照真係好可愛～而老公朱少傑睇嚟係化得最濃妝嘅一位（笑）～

已經冇乜出嚟拍劇嘅郭羨妮，原來係2015年8月因約滿而離開咗一齊合作咗16年嘅大台，而《無雙譜》就係佢係無綫嘅告別作～而家專心家庭生活嘅佢，睇嚟想睇佢出嚟拍劇都好難，粉絲唯有睇返佢以前啲舊劇懷念吓啦～

Text: Girls editorial

Photo Source: Weibo/Facebook/Pinterest