《不可思議的媽媽》開播！Yumiko第一次帶梁浸浸上節目，田亮仔仔顏值比爸爸更高～

大陸親子節目《爸爸去哪兒》每季都咁多人睇，除咗藝人嘅知名度急升之外，一眾小萌娃亦都圈粉無數～騰訊見到親子節目咁收得，就推出咗《不可思議的媽媽》，由媽媽帶小朋友去旅行！

出演《不可思議的媽媽》嘅女藝人入面，香港人最熟悉嘅一定係Yumiko～Yumiko仲係第一次帶埋女女梁浸浸上節目，平時梁浸浸喺IG已經圈粉無數，佢著啲衫仲要勁潮，仲有一頭自然捲嘅微曲長短，簡直似足媽咪呀～

可能梁浸浸仲細個，所以同其他小朋友唔太玩得埋，全程都好似隻樹熊咁攬實媽咪～

到夜晚臨瞓前梁浸浸掛住玩電話，唔小心跌落床，好彩Yumiko及時捉住佢！不過「電話大過天」，梁浸浸好冷靜繼續玩電話～

除咗Yumiko之外仲有葉一茜呀～有留意開《爸爸去哪兒》嘅粉絲應該都會有啲印象，葉一茜就係田亮老婆，喺《爸爸去哪兒1》田亮帶住森碟去旅行，今次就輪到葉一茜帶小亮仔上陣～小亮仔真係勁靚仔，集齊爸爸媽媽嘅優良基因！

小亮仔亦都比網民盛讚「個性好好」、「很懂事」，喺節目入面佢鼓起勇氣向途人推銷羊肉串，由最初怕怕醜醜唔敢出聲，自我鼓勵：「我真的真的很不錯！」，到最後成功Sell到途人幫襯，睇到佢真係一個好乖好懂事嘅小朋友～

喺大陸比較多人討論嘅反而係內地女藝人何潔同仔仔七寶～因為七寶嘅軟萌小奶音BB話，仲特別識得撒嬌。事緣係媽媽叫七寶拎橙汁，但係整跌咗盒橙汁，仲要扮唔夠力拎起盒橙汁係度喊：「我哭了，剛才我哭了，我特別小」，令到一班網民覺得佢好可愛～

網民仲話佢同韓國節目《超人回來了》入面嘅民國好似樣，得意又搞鬼嘅表情可以拎黎做表情包咁話～

雖然哩套《不可思議的媽媽》冇《爸爸去哪兒》咁大迴響，但係有得睇梁浸浸嘅呆萌樣，小編都會堅持追落去呀～

Text Source：Girls Editorial

Photo Source：Weibo