「冇人以為喎」玩足全晚！馬明瘋狂擦Do姐鞋氣氛超尷尬，網民：馬明似搭枱已經開始掛住黃翠如～

《Do姐去Shopping》上星期同黃翠如去日本玩真係笑到大家碌哂地！今個星期開始就到小馬馬國明＋農夫＋Do姐去到丹麥Shopping，雖然之前都拍過上輯嘅英國篇，但係睇咗第一集嘅觀眾都話馬明唔係好夾哩個組合，你地又點睇？

天然呆馬國明喺哩幾集嘅地位明顯係上賓級，Do姐一見到馬明就好Nice咁歡迎佢～沒有比較就沒有傷害，農夫自然又成為下把位，一黎就輕輕打咗陸永一吓啦～

不過亦都有唔少笑位！Do姐叫C君扶佢上馬車，農夫兩隻「卡啦蘇」就手舞足蹈話：「想畫度符～」

去到第一個景點嘅時候，馬明已經一輪嘴將背好嘅介紹讀出，Do姐都讚佢做足功課～

陸永將自己背好嘅稿讀出時，Do姐一臉質疑問：「你點會知道架？」，陸永就話：「你估我黎旅行呀？我黎上堂架，我有做足功課架！」

然後去咗皇室茶葉店，陸永指住個中文字牌匾話：「你地唔好以為哩個係哩間舖嘅中文名呀」Do姐即刻話：「冇喎，冇人以為喎！」勁搞笑～

上去一間賣茶具嘅店舖，Do姐話：「你唔好以為係手袋喎」，農夫即刻寸返Do姐話：「冇人以為喎！」～

不過馬明就話：「Do姐唔係手袋黎架咩？」，俾返少少面比Do姐下台，令到Do姐盛讚馬明乖仔！

去到飲茶嘅時候，陸永又話：「大家唔好以為係上咗年紀嘅人先鐘意飲茶喎」，又俾位Do姐入：「冇人以為喎」，馬明又加入Do姐「冇人以為喎」，好彩仲有C君撐陸永：「我以為呀！」

當C君飲茶時又話：「唔好以為我哩杯茶咁濃係普洱」，Do姐：「冇人以為喎」！好彩陸永都有幫返C君：「拎杯普洱黎」，2對2都叫做令農夫哩個旅程過得舒服少少呀～

陸永未飲杯茶已經「嘩」定先！

陸永終於俾Do姐讚返次，令到佢地不知幾開心！

又到馬明擦鞋時間啦！「絲質眼罩唔係好啱Do姐用，因為Do姐一條紋都冇～」

點知又俾農夫話：「即係你話Do姐似面具呀？」，網民就話覺得農夫似想暗示Do姐整得多⋯⋯

到陸永介紹養生茶俾Do姐先好笑！佢話Do姐都唔係好啱用，因為佢冇「生」要養～（唔通又係暗示Do姐老⋯⋯）

C君話要送個刷俾馬明，因為馬明咁識擦鞋～

陸永又寸下馬明：「我冇訪問人地，我剩係背稿架咋！」

今次換咗馬明，有部份網民都話哩個化學作用唔錯，令到農夫好慘咁好搞笑咁話！不過亦都有網民話，已經開始掛住黃翠如，覺得馬明太顧形象、太有偶像包伏，唔係好放得開～

你地覺得哩個組合點哩？小編就覺得哩個組合幾盞鬼，見到農夫好委屈同好慘慘豬嘅下把位形象就覺得好搞笑啦～

Text Source：Girls Editorial
Photo Source：TVB