最期待的畫面出現了！大小姐VS大家姐兩個巴渣惡女大鬥法，網民：「呢集真係好高汁！」

《開心速遞》入面兩大巴渣惡女一定非大家姐熊尚善&大小姐龍力蓮莫屬，之前有網民討論過「如果將大小姐同大家姐擺埋同一集一定好正」，結果編劇真係喺噚晚嗰集滿足咗我哋嘅願望！噚晚「末路狂花」將大家姐同大小姐大鬥法，兩個人擦出嘅火花仲令到一眾網民紛紛留言：「呢集真係好高汁！」

首先一開始就講到大小姐同大家姐喺架車上面話自己殺咗人，唯有衝落海先可以逃避法律制裁！單單睇呢度已經令人覺得好吸引、好想追睇落去！

之後就講返24小時前嘅事，返返去根叔同大龍生喺初戀Cafe裡面，因為脫髮問題而再次嘈起上嚟！大小姐同大家姐為咗自己嘅父親而舌劍唇槍，力數對方不是～睇住兩個惡女喺度嘈交真係好搞笑！

之後佢地仲為咗一碟白雲鳳爪而鬥起上嚟，侍應哥哥仲唔小心爆咗一直以嚟大小姐最鐘意食嘅無骨鳳爪，原來係佳叔「妹」出嚟嘅事實！

大家姐率先羸一仗，但係大小姐都唔執輸搵咗熊若水同埋樹仁嚟出氣，話要調樹仁去做地盤！

去到夜晚大小姐同大家姐都有份參加「十大傑出婦女獎」，竟然犯咗女人嘅大忌–撞衫！佢地一齊講「收聲」呢下真係霸氣到暈～

佢地兩個係廁所互相「小學雞」地撥水、「大學雞」地撥番梘水！

最搞笑係大小姐話：「你完咗更年期都未係我對手呀」，點知講完呢句就齊齊被個痴線佬綁架！

之後嘅劇情就係向《恐懼鬥室》致敬，痴線佬阿倫坐住架車仔出嚟嗰下真係好正！！

雖然大家姐成功逃脫，但佢都冇留低大小姐一個係度，勁有義氣＋勁型咁講咗句「我話過我一定會救你㗎嘛！」真係Feel到嗰種患難見真情～

然後仲要嚟個慢鏡影住佢地勁型咁逃跑去架車度，難怪網民都話今集拍得好用心！

最Sweet嘅係大小姐同大家姐喺架車度做好朋友：「我對朋友好有要求，你份人囂張臭寸，成日以侮辱人為樂，自戀自大自以為是，不過啱啱符合做我朋友嘅最低要求～

正當以為可以逃出嘅時候，原來個痴線佬跟住上咗車！經過佢地一番打鬥，以為打死咗個痴線佬，一路揸車逃跑逃避警察追捕，直至嚟到海邊無路可退！

最型最型嘅都係呢度！熊尚善捉住大小姐隻手：「好高興認識到你，如果有下一世，希望我地嘅友誼可以長久啲！」

後尾發覺個痴線佬未死，原來佢地根本冇殺到人，就勁放心咁行出車箱～

一齊慢鏡行出車箱又係勁正！

唔少網民都大讚今集好高質，兩個人好有花火：「大小姐同大家姐會鬧交但係危急關頭又好照顧對方！準備衝落海個幕好笑又感人！！好想繼續睇大家姐同大小姐！好有化學作用！」

甚至有網民話今集啲鏡頭比8半同9半靚！令到唔少網民都大讚編劇好似食咗藥咁，令到劇情神展開～而且今集真係由頭笑到落尾，好想繼續做多啲大小姐X大家姐嘅劇情呀！

Text：Girls Editorial

Photo Source：TVB