翻唱日文歌表白「狄奇」！人靚聲甜譚凱琪憑《大帥哥》再度爆紅，網民：娶到譚凱琪就好啦～
《大帥哥》除咗張衛健演技亮眼出色之外，喺電視劇入面有相當多戲份嘅「天嬌」譚凱琪（Zoie）亦都俾唔少觀眾大讚！雖然近日劇情講到「天嬌」已經公開自己係間諜嘅身份，但係有情有義嘅「天嬌」已經愛上大帥哥，仲為咗佢而放棄國家！呢個雙面人嘅角色設定真係令觀眾憎唔落，觀眾仲高呼：「還我天嬌」添！
「天嬌」因為被大帥哥出賣，一邊喊住一邊話自己為咗大帥哥可以犧牲自己、背叛國家，「天嬌」嘅真情對話完全表達到女人對於男人真心嘅渴求，喺大帥哥面前，「天嬌」都只係一個陷入愛情嘅小女人⋯⋯呢一幕真係睇到觀眾眼濕濕！
譚凱琪最近仲翻唱日本歌手荒木毬菜嘅《小雨と君》表明心迹，將對大帥哥嘅愛慕之情盡訴曲中～其實譚凱琪曾經係「日本樂壇教父」小室哲哉嘅徒弟，2000年簽約小室哲哉公司ROJAM，亦都去過日本受訓4個月，之後推出唱片～唱功真係有返咁上下功力㗎！
唔少網民大讚：「譚凱琪喺一班同張衛健有對手戲嘅女演員入面，佢同張衛健嘅Level最接近」、「天嬌你做得好好，你先係女主角，你死左唔想睇了」、「TVB欠譚凱琪一個女演員獎項」、「你演的好好我忍不住哭」
譚凱琪外表甜美可人，估唔到佢原來已經37歲！Zoie皮膚白哲緊緻，而且佢身材仲好好，之前曾經喺TVB劇集入面以性感貼身短裙上陣，令到同劇男演員都把持唔住！
除咗有樣有身材，譚凱琪都係一個好錫屋企嘅女生！Zoie由18歲開始出嚟打工養家，將一半收入俾媽媽作為家用，當自己工作收入唔穩定時亦都繼續俾錢屋企～之前有雜誌影到佢同媽咪行街仲會幫媽媽整理鞋帶；亦都會喺空餘時間陪爸爸行山，真係乖乖女無誤！
雖然有個有錢男朋友，但Zoie之前受訪時都講過同男朋友一齊賺多啲錢、儲錢結婚，亦都強調自己努力賺錢自己駛，財政獨立嘅女性亦都令網民覺得Zoie真係娶得過！
《大帥哥》入面「天嬌」呢個角色令到Zoie成功入屋，真係唔少朋友都話睇到眼濕濕！希望之後會有更多機會喺電視見到Zoie啦～
Text：Girls Editorial
Photo Source：Instagram、TVB
❣️ 立即 Follow 我們的 Instagram girlstyle.mag
✨GirlStyle 女生日常手機應用程式正式登陸 App Store 及 Google Play✨ 👉 立即下載
