DO姐追韓星勁有少女心！陸永囡囡獲DO姐送BTS門票齊齊追星，朴寶劍坐第一排勁Surprise！！

有「世界彈」之稱嘅韓國組合「防彈少年團」（BTS）紅遍全球，多次打破韓國組合紀錄，更加勁到入圍《格林美獎》同埋登上<Billboard 200 ALBUMS>，人氣絕對係冠絕Kpop所有組合～近日BTS全球巡迴演唱會嚟到香港站，吸引咗唔少Fans入場，當中喺Fans之間引起話題嘅絕對係Dodo姐！

Dodo姐一向都係「防彈少年團」嘅Fans，更加多次喺電台節目度公開表示好欣賞佢地！而喺「防彈少年團」入面，佢最鐘意嘅隊員就係V，之前仲稱呼V做「泰泰」添（因為V本名係金泰亨）～今次去睇佢地嘅演唱會，Do姐仲要勁少女心地拎住V嘅透明應援扇！！

最令人Surprise嘅係，Do姐竟然將一票難求嘅演唱會飛送俾陸永囡囡Hannah！需知道防彈少年團嘅演唱會飛好難買之餘，仲要俾黃牛炒到勁貴！之前Hannah一路都有同爸爸媽咪講好想睇BTS演唱會，最後Do姐就將呢張咁珍貴嘅演唱會門票贈送俾Hannah，陸永仲話：「do姐打嚟話有飛請Hannah嗰日爭啲喊出嚟」

然後兩位7歲＋61歲充滿少女心嘅小女孩就結伴去睇防彈少年團嘅演唱會啦！睇吓Hannah睇得勁投入，仲要識唱韓文歌詞添㗎！！

而陸永同太太Reina就喺場館外面等足全程，等Hannah睇完演唱會再接佢，絕對係廿四孝父母無誤！

BTS喺全球都有勁多Fans，唔少明星都係佢地嘅忠實Fans！今次香港場令到粉絲們都大感驚喜嘅一定係男神朴寶劍都去咗睇今場演唱會，仲要坐最前排嘅A1行！小編真係超級羨慕今場觀眾可以一次過睇BTS同埋朴寶劍呀！！！

唔少BTS嘅Fans話見到Hannah有飛，都表示羨慕又妒忌！而且仲有唔少Fans喺Do姐張相入面話：「Do姐快啲入後台同泰泰（V）影相啦！」、「好羨慕Do姐啊！我都冇得睇，啲飛太貴」、「為咗佢你破例夜瞓」

唔少Fans都期待Do姐會喺電台節目分享今次演唱會經驗，Do姐仲話「Loving BTS has no age barrier」！啱呀，追星邊有分年紀㗎～～Do姐之前仲買埋BTS嘅周邊產品，佢對BTS係真愛，仲要係如假包換嘅ARMY！

Text：Girls Editorial

Photo Source：Instagram