得Bob鼓勵先去韓國追夢？王嘉爾自薦上《Do姐有問題》爆「好鐘意農夫」，更指定要阿Bob出演！

DoDo姐一向出名係超級韓迷，除咗BTS嘅V之外，Do姐仲同過孔劉、朴敘俊等男神成功集郵！不過講到同Do姐最Friend嘅就應該係Jackson啦～Jackson最近返嚟香港除咗做Sammi演唱會嘉賓之外，仲上咗Do姐嘅電台節目同埋《Do姐有問題》，為Do姐撐場！

Dodo姐一向深受後生仔歡迎，即使Do姐已經年屆61歲，但依然充滿少女情懷，對於年輕人關心嘅事瞭如指掌，好多老藝人都唔及Do姐咁有時事、娛樂觸覺㗎！Do姐接受訪問時已經話自己睇過哂Jackson嘅所有演出！

不過大家都估唔到嘅就係，竟然係Jackson主動話想出演《Do姐有問題》！Jackson仲話自己好鐘意「農夫」，不過Do姐就即刻話：「真係估唔到呀可？農夫都有人鍾意」，咁都有位入「農夫」真係好搞笑！

喺香港長大嘅Jackson同90後嘅我地都有著相同嘅童年回憶--就係聽「新香蕉俱樂部」，聽人地分享心事同煩惱！Jackson仲話自己係「新香蕉俱樂部」嘅頭號Fans，真係估唔到呀！

而阿Bob今日喺Facebook Po咗張同Jackson嘅合照，表示：「十四年前，有個細路打電話去我嘅電台節目，佢話希望第時大個咗可以做一個歌手，咁我好老實問佢屋企有冇米，有就去啦，佢以為我話食飯嗰d米，所以佢話有.........」當年打電話上嚟嘅小粉絲成為全球知名巨星，相信阿Bob發夢都冇諗過呀！

Jackson每次返嚟都冇忘記Do姐，佢地感情真係超好～每次見到Do姐Po同韓國男神嘅合照都覺得Do姐簡直就係迷妹們嘅典範！

Text：GirlStyle Editorial

Photo Source：Instagram