《愛回家》疑似暗寸ERROR成員193郭嘉駿開Cafe呃錢～ 聲稱追星效應作「生招牌」靠粉絲應援吸金!

TVB處境劇《愛‧回家之開心速遞》劇情一向緊貼時下熱話, 有時加入貼地情節，又有二次創作, 幽默鬼馬, 深受網民歡迎。不過最近一集(第1643集) 劇情講「蔥頭」以明星效應開咗間cafe, 疑似影射ERROR成員郭嘉駿193開的cafe擺明呃錢。

故事講述「蔥頭」以明星效應開設cafe, 大小姐得知後隨即朝聖,「蔥頭」強調cafe設計以「個人風格」為主, 絕對唔係為咗賺錢, 只係為咗有多一個空間可以同粉絲聚會, 此話一出, 疑似暗寸193。

而且劇情內容亦講到「蔥頭」間cafe開幕, 就立即引起大批粉絲們支持, 十足十講緊193 新店cafe開業當日, 已有一大班老婆S到場力撐偶像。

劇情亦提及Terry眼見「蔥頭」開cafe打響名堂, 有樣學樣想以明星效應開cafe，想搵大小姐、同舅父KC幫手科水打本開cafe。大小姐即刻強調開cafe最少投資「七位數字」, 好似影射緊193投資咗200萬開設café咁。

而且大小姐理直氣壯回應Terry: 人地「蔥頭」貴為人氣偶像、粉絲眾多, 吸金能力強先可以賺到咁多, 相反Terry就無人識, 點會賺到錢。

193@ERROR一向數口精,甚有生意頭腦,面對疫情他選擇逆行, 今年連同幾位中學同學逆市合資開設日式精品咖啡店「Tanuki Coffee」, café位於紅磡坐落小巷的交界, 鬧市中難得寧靜的小巷子, 店內裝修採用白色及黃色為主，整體感覺好開揚,好清新,。

至於食物方便會加入韓國口味, 193最推介的Brown Cheese Waffle, 選用挪威Brown cheese 製作, 提升芝士層次口感, 至於咖啡亦特選3至4款咖啡豆, 滿足各位咖啡控需要。

人紅是非多, 193 cafe開業不久卻遭食客投訴呃錢, 貨不對辦, 直指一份98蚊的蛋治味道一般，餡料只得一半，與menu宣傳圖略有出入, 一向敢言敢語的193 早前出席活動時霸氣回應：「我諗佢應該係冇去過cafe食嘢 , café一向都係呃錢，你要平可以去食兩餸飯，企喺街邊食。我呢度有埋裝修，所有配套價錢嚟講完全合理。」

對於有網民上傳店內的食物賣相照片，193自言也覺得很肉酸, 已向拍檔跟進, 確保員工控制品質, 並改良食品：「歡迎大家下次再嚟, 包你食到嘔。」

Text: GirlStyle Editorial

Photo source: 193 IG 、《愛回家》截圖、Viu TV 截圖