張敬軒自揭拍拖次數兼開始想被照顧！如遇真愛會淡出舞台，承認有真正愛過一個人～

由黎芷珊擔任主持的TVB節目《芷珊約您》，最近請來了入行20年的張敬軒擔任嘉賓，兩人進行深度交流。在節目中，張敬軒罕有大談感情事，提到自己開始有想被照顧的念頭，又自爆曾真正愛過一個人！

張敬軒罕有大談感情事

現時43歲的張敬軒在節目中坦言開始出現想被照顧的念頭，被問到有否遇到適合發展對象時，他思考了一會兒後表示在娛樂圈不太能結識到人，而且自己又不會輕易給一個人進入生命之中。之後被問到拍拖次數，他就說：「拖過一隻、半隻手仔咁啦～我係一個講將來嘅人，但一去到講將來，標準就會唔同，會開始注意同對方食飯，大家口味夾唔夾，我係唔會『不如行吓睇吓點先啦』，我所有嘢都要周詳計劃」。

軒公承認自己有真正愛過一個人，又認為父母的感情有影響他的愛情觀：「佢哋兩個係南轅北轍，其實佢哋到依家都唔夾，我見到媽嘅痛苦，矛盾到依家40幾年都冇解決，我相信佢哋到離開嗰日都唔會解決到，我唔可以畀我人生係咁，我想大家是互相扶持」，更直言如果遇到真愛或會淡出舞台，因為他想將人生剩餘的時間與心愛的人共度。

曾全部手指變成黑色疑患上怪病

其後主持要求張敬軒自爆一個小秘密，他就透露2012年某一天發現十隻手指突然變成黑色，而且洗手都洗不掉，還是從內到外發黑，好像中毒了。他續說：「我係一個有疑病症嘅人，嗰時又有抑鬱，入咗私家醫院檢查後所有嘢都係正常。嗰6、7日我係人生第一次覺得『如果我突然間死咗，阿爸阿媽點呢？』，於是我打電話畀我身邊嘅人安排好所有嘢，但最後驚覺原來係條牛仔褲甩色。

雖然只是一場「烏龍」，但他就認為這件事好像一個炸彈，令他覺得「如果我突然間走咗，我剩低嘅嘢係唔夠阿爸阿媽過生活」。

做歌手是因為「賺錢賺得快」

入行多年的張敬軒，事業看似一帆風順，但他就提到2004年是他的低潮期，當時家裡出現經濟困難，令他開始覺得無法掌握自己的生活和命運，他又承認做歌手的原因是因為「賺錢賺得快」。說到未紅時，張敬軒提到過去曾流連酒吧唱歌，當時更遭受到不少客人的不禮貌對待「唔需要有原因㗎，一籃花生殼就飛埋嚟！」，又指那時有不開心的感受，不過幸得當時的經歷，才使他磨練出圓滑的性格。

希望可以向後輩分享經驗

被問到未來十年的計劃時，張敬軒就表示希望可以將以往累積到的經驗與後輩們分享：「用我哋捱過嘅苦頭去話畀佢哋聽捷徑喺邊度，呢啲係好好嘅傳播。最後張敬軒坦言現在的他很快樂，他說：「行到42歲，呢兩年係我人生最好嘅時候。我有自己團隊，無論做演唱會或者拍Youtube都有好反應，自己派嘅歌反應又好好，爸爸媽媽生活又安穩，自己想食嘅嘢又食得起，想去嘅地方又去得起，覺得人生好圓滿，但要Keep住落去係唔容易」。

Text：Girls editorial

Photo Source：《芷珊約您》@YouTube截圖、張敬軒@IG