代表80、90後嘅青春！有一種友誼叫Twins，一齊回顧香港女子天團Twins 16年嚟嘅陪伴！

轉眼間，代表80、90後嘅青春Twins都已陪伴咗我哋16年啦！蔡卓妍（呀Sa）及鍾欣潼（呀嬌）係哩16年黎經歷過人生好多高低起跌，但依然都陪伴著大家身邊，彼此扶持，可能哩啲就係一種Twins嘅友誼，等我哋都一齊回顧香港女子天團Twins哩16年嘅陪伴啦！

2000年

1. 當年未有隊名嘅呀Sa同呀嬌因係澳門綜藝館登台時，兩人嘅一下側手翻而贏得咗全場掌聲，由於兩人嘅髮型同外型都相似，成日被人誤認，公司最後決定幫佢地改名為Twins！

2001年

2. 係2001年5月8號Twins亦正式成立！一推出同名EP《Twins》當日就已經即刻售罄！

3. 而同年推出嘅歌曲《女校男生》、《愛情當入樽》、《戀愛大過天》等都被唱到街知巷聞，當年每個少女唱K都必點佢哋嘅歌！

4. 而係年底嘅樂壇各大頒獎禮中，Twins橫掃哂多個新人同組合獎，包括商業電台叱咤樂壇流行榜頒獎典禮中的「叱咤樂壇組合銀獎」名「叱咤樂壇我最喜愛的組合」，雖然出道只得半年，但已得到大家嘅肯定，當年佢地拎獎，身為佢地粉絲嘅80、90後都真係比佢地更開心！

2002年

5. 當年暑假第一次合作拍電影－《這個夏天有異性》，相信冇人未睇過（笑）

6. 9月時，更係佢哋第一次踏足紅館開咗一連3場《Ichiban興奮演唱會》，Twins當時成為歷史上出道時間最短就踏上紅館，而當時呀Sa只得19歲，成為咗最年輕係紅館開演唱會嘅女歌手～唔知有邊個當年成功到飛去睇呢？

2003年

7. Twins同張國榮一齊參與賀年歌《你最紅》嘅MV拍攝

8. 當年造型百變嘅歌曲《千金》更係Twins第一首四台聯頒冠軍歌，同年更得到「叱咤樂壇組合金獎」，其實Twins嘅名氣就係好勁，當年絕對冇任何組合同到佢哋比！

2004年

9. 係1月舉行第二次紅館演唱會《零四好玩演唱會》，仲同一班FANS一齊倒數～

2005年

10. 進軍亞洲市場，仲發行咗第一張國語專輯《見習愛神》，亦係台灣同中國大陸舉行各大校園演唱及國內演唱會！

2006年

11.  獲香港杜莎夫人蠟像館邀請於館內設立蠟像，成為咗最年輕獲邀藝人！

2007年

12. 因成立咗6周年而推出紀錄專輯《我們相愛6年》，封面放咗兩人嘅結婚照

2008年

13.  哩年亦係Twins嘅低潮期，因為呀嬌捲入不雅照事件而形象受損並即時被暫停演藝工作，當年亦令好多粉絲感到傷心！

2009年

14. 呀Sa發行第一張個人專輯，而主打歌《二缺一》亦被受好評！唱片更衝破3萬張銷量，亦獲頒發白金唱片～

2010年

15. 重組Twins，更強勢回歸，舉行《人人彈起2010演唱會》

2011-2012年

16.  為紀念出道十年，Twins十週年限量紀念國語專輯及寫真《3650》正式發行！而2012年，Twins廣東專輯《2 Be Free》係3月1日推出，但因想保持神秘感，專輯封面係推出前一日先對外公布，封面亦被視為Twins多張專輯中最突破嘅一次

2013-2014年

17.  兩人主要各自發展，呀嬌憑專輯《完整愛》獲新城國語力頒發三項音樂獎項，而呀Sa就憑英皇電影《雛妓》入圍第34屆香港電影金像獎最佳女主角同第6屆澳門國際電影節最佳女主角！

2015年

18. Twins第二次係紅館舉行跨年演唱會－「Twins LOL Live in Hong Kong」，反應非常熱烈，而且仲兩度加場！

2016年

19. 開始展開「Twins LOL Live around the world」世界巡迴演唱會

2017年

20.  2017年5月18日 Twins係16週年成軍紀念日宣布已入紙申請Twins LOL Live香港Part2演唱會，一眾fans都表示我地嘅青春回憶又返黎啦～

「肯陪你的人很多，但肯陪你一直到最後的人很少⋯感謝妳，你和你們」呀Sa亦係Twins成立16年嘅日子係IG發表感言！其實唔單止我哋見證著Twins嘅成長，Twins嘅歌曲亦陪伴著我哋成長！