編劇係咪痴咗線！《愛回家》IT狗題材貼地又寫實，網民：高質到痴咗線，幾時入圍奧斯卡？

一向都覺得處境劇係拍俾啲老一輩睇，但《愛回家之開心速遞》就一反常態，劇本搞笑貼地之餘亦都專攻後生仔市場，令到唔少年輕人都重拾睇電視嘅樂趣！噚日嗰集嘅《愛回家》就被網民大讚「高質到痴咗線」、「好耐冇試過睇TVB笑出聲！」

噚日嗰集嘅《愛回家》就講到一事無成嘅Terry，無論做乜嘢職位都做唔好，最後就被安排入去IT部～一入到去IT部，Ivan就向Terry講解日常運作，好彩Terry都有自知之明，一早講定自己只係識得開機同關機！一聽完Ivan講IT部日常運作，Terry仲講咗句大眾對IT部嘅誤解：「我以為IT部好得閒，日日都有好多時間打機！」

然後Ivan介紹IT部同事，三個同事分別叫做Keyboard、CPU、Mouse！佢地只係閃閃縮縮咁望咗Terry一眼，就繼續望實部電腦，同大眾印象中嘅IT毒男勁似～

Terry仲要勁唔識做咁問：「點解佢地著衫Style差唔多，係唔係制服？」，令到IT部嘅同事忍唔住係Chatroom度鬧Terry！

期間有個叫做CD-Rom嘅舊同事就返嚟威龍百貨，仲因為做咗金融財俊而改名做孖展，返到嚟仲話「我都不知幾好彩而家唔洗做IT狗」「IT狗」其實係網民對於IT人嘅稱呼，老一輩嘅未必識呢個Term，但其實每個人公司都總有一個IT部嘅同事，專門解決公司電腦問題～

見到Terry「整電腦」就覺得勁搞笑，Ivan教佢「檢查啲制，然後再Reboot部機就搞得掂」，唔洗同人解釋點樣整返好部機！如果遇上整唔掂嘅電腦，可以講啲懶係複雜深奧嘅IT名詞，令到同事俾佢拎返IT部搞～

結果Terry真係喺IT部做出成績（識得Reboot部電腦），為咗更加融入IT部，佢著起格仔恤衫、成為油頭毒男，仲改咗個名做Wi-Fi！一睇呢個造型真係忍唔住笑咗出聲～

仲要話「唔係好習慣面對面同人講嘢」

大家對於IT部同事嘅印象都係：沉默寡言、唔出聲～之後因為威龍百貨俾黑客入侵，令到IT部同事們終於開聲講嘢啦！！！

Ivan仲化身成為「IT狗」，同黑客決一死戰！之後仲出現咗Matrix一幕，令到網民忍唔住大讚：「今集愛回家係咪痴咗線呀！！」，雖然呢幕膠膠地，但真係好搞笑！

其實今集唔係想踩底IT行業，而係想道出現實裡面做IT嘅辛酸呀！「真係當我地IT狗呀？得個做字，每年加人工加得最少，炒人就即刻諗起我地！」Ivan亦都講咗句鼓勵人心嘅說話：「我地唔好咁快否定自己嘅專業，總有地方需要我地，記住，我地係IT人，唔係IT狗！」

網民睇到呢集之後，就即刻大讚「好耐冇試過睇TVB笑出聲」、「笑到肚痛」、「無綫真係做膠劇最叻」、「TVB最高質就係愛回家」

TVB成日都有大製作、大卡士劇集，但其實呢啲貼地小品之作更加好睇呀！

Text：Girls Editorial

Photo Source：TVB