對白夠啜核又傳神！影后葉德嫻串爆大數地鐵乞人憎行為，網民：「寫實！應該加埋唔好剪指甲！」

網上周不時都會有網民票選「搭地鐵／巴士最黑人憎行為」，其實每一樣都令人好反感！最近運輸署就邀請咗影后葉德嫻（Deanie姐）拍片宣傳，提醒乘客搭車時要兼顧旁人，勿做自私精！呢條短片一推出就大受網民歡迎，全因Deanie姐嘅演繹＋對白夠哂啜核又傳神～～

噚日運輸署喺YouTube上載一段宣傳短片，邀請影后葉德嫻出馬助陣！Deanie姐份人一向爽直，佢喺短片入面用Mean到爆嘅語氣教訓多名冇公德心嘅乘客，將大家平時只夠膽喺心入面OS嘅說話講哂出嚟，真係睇到大快人心！

喺地鐵車廂入面真係好容易遇到好多奇人異士，衝閘呢啲已經算係小Case！最常見又勁黑人憎嘅行為一定係「開Speaker聽錄音／聽歌／睇片」，超級滋擾之餘其實真係冇人想知你同朋友嘅對話／你睇緊乜嘢！！短片入面Deanie姐就寸爆咁講：「喂？你估呢度你屋企咩？用耳筒聽啦！」

又會有好多乘客鐘意利用地鐵扶手嚟做熱身運動，Deanie姐就直接講：「小姐你真係好武功呀，不如做個後空翻嚟睇下啦？」

仲有啲人喺地鐵上面施施然食嘢，Deanie姐就話「你不如打埋邊爐啦！」

近年成日發生乘客同巴士司機互毆／口角嘅事件，喺呢條短片入面都重現返呢啲情節！好似乘客掛住睇電話而Miss咗班車／唔記得落車，明明係自己做錯但又要鬧司機，Deanie姐喺短片入面亦都忍唔住大鬧：「你有冇搞錯呀？咁巴閉，坐直昇機啦！ 」

仲有巴士上面啲人最鐘意就係拎個袋霸住個位／放對腳喺座位上面，真係勁冇品！！！

呢條短片一推出就引來網民大讚：「一針見血，應該喺車廂入面日播夜播」、「呢個廣告太正了⋯寫實！唔會過份理想化！唔會太過好聲好氣！」、「加個唔好剪指甲，唔該」

今次呢條短片真係搞笑得嚟又有教育意義，希望大家都可以做個好乘客，「搭車顧自己，都要顧人哋」！

Text：Girls Editorial

Photo Source：YouTube