做女仔一定要夠嗲？同「不懂撒嬌女仔」拍拖嘅6個好處，女漢子都一樣有MARKET！

之前就有套《撒嬌女人最好命》，而大台就啱啱播緊《不懂撒嬌的女人》，究竟女人係咪真係一定要夠嗲識撒嬌？NONONO！以下6個同「不懂撒嬌女仔」拍拖嘅好處，將會證明畀你睇女漢子都一樣有MARKET！

1. 同佢一齊，食大排檔都可以有米芝蓮享受

女漢子直腸直肚，食嘢從來都唔會介意環境，最緊要係好食同埋同邊個食！邊個話豆腐火腩飯一定係男人的浪漫？同女漢子一齊，無論係食大排檔定係掃街都OKAY！

2. 好似多咗個最親密嘅「兄弟」

可能識得撒嬌嘅女仔的確會激起男仔嘅保護慾，不過當撒嬌過度就分分鐘會變成公主病！同女漢子一齊，你未必可以聽到好多甜言蜜語，不過佢一定會係你最親密嘅「兄弟」！鬥麻甩，佢未必會輸畀你架～（笑）

3. 有嗰句講嗰句，唔洗估估下

男仔最怕女仔口不對心，成日都會估估下，其實女漢子都係！可能有人會覺得咁樣係情趣，不過你諗下如果做完一日嘢已經好攰，仲要下下估你諗乜，估唔中仲要嬲嬲豬嗰時，女漢子有嗰句講嗰句嘅性格絕對係另一種體貼啊！

4. 玩樂好拍檔

有啲女仔行山又話怕曬黑，做運動又話怕比蚊咬，最好就係全天候係冷氣商場行街！男仔到底係想要個識撒嬌但多要求嘅女朋友定係一個可以陪佢睇波打機做運動都冇怨言嘅女朋友？

5. 自主獨立

其實撒嬌真係好好用，講兩句好多野都唔洗自己做。有時女漢子唔係唔識撒嬌，而係不屑撒嬌！自己能力做到嘅野點解要人代勞？水可以自己換，袋可以自己拎，錢可以自己畀，自己的事自己做，絕對唔需要你費心～

6. 令你更加想征服佢

雖然好多男仔都鍾意嗲聲嗲氣嘅女仔，不過唔代表女漢子冇佢嘅market！正正就係因為女漢子夠獨立夠tough嘅性格，反而令男仔覺得更有挑戰性，令你更加想征服佢！呢啲就係女漢子嘅獨有魅力～

雖然女漢子嘅好唔係個個都識得欣賞，不過佢地係絕對有自己嘅market！

source: tvb.com、instagram