ELF睇到勁有共鳴！馮盈盈力讚《愛回家》製作勁用心，Super Junior專用寶石藍色都通通放到劇集裡！

唔知由幾時開始，《愛回家之開心速遞》就成為咗TVB收視保証，即使有重頭劇《深宮計》、《飛虎之潛行極戰》加入陣營，喺坊間嘅話題度亦唔及《愛回家》多！雖然《愛回家》只係處境劇，但係製作絕對唔馬虎，好似今集咁就睇得出劇組好用心準備每一個細節～

噚晚《愛回家》講到威龍百貨公司請到韓國組合「Super Senior」嚟開小型演唱會，員工仲可以得到免費門票！作為粉絲嘅若水、Mandy、Rebecca同埋楊洋都非常雀躍～

明明群姐之前話自己好愛歐陽震華，點知而家「Super Senior」一嚟就變咗佢地嘅Fans！比大小姐聽到就忍唔住指住個頭鬧佢「水性楊花」～

本身以為有免費飛，但原來啲飛一早就比行政部扣起哂！令到若水、Mandy、楊洋等人都要通宵喺購票處門外排隊等買飛～

當佢地排完通宵，以為有得買飛嘅時候，工作人員就出嚟話所有飛已經賣哂！喺明查暗訪之後，佢地發現啲飛原來比Jenny Keep起哂嚟炒黃牛，原本免費嘅門票賣到成2000蚊一張！呢個情況同早兩個月炒五月天、黃子華、久石讓一模一樣咁濟，令到好多網民都勁有共鳴！而大小姐亦都出動去打擊「雷黃牛」Jenny！

睇完呢集之後，連馮盈盈都忍唔住係IG Story大讚有共鳴！大家都知道「Super Senior」就係講緊韓國男子組合Super Junior，而馮盈盈就正正係一名ELF（Super Junior粉絲名）！

點解馮盈盈會話有共鳴呢？因為今集製作真係好認真！喺若水佢地通宵排隊嘅時候，成條排隊長龍都係著住Sapphire Blue寶石藍色嘅應援外套，有追開Kpop嘅都知道寶石藍就係Super Junior嘅代表顏色，亦都有「藍家」嘅外號～外套上面仲印有「Super Senior」嘅會徽！

同埋搵返嚟嘅臨時演員舉住嘅應援牌都真係有韓文～雖然道具組做好呢啲嘢係應份，但對於一向事事但但嘅TVB嚟講，《愛回家》算係唔錯啦！

相信睇到呢集嘅咁多位迷妹＋Kpop Fans都睇得好有共鳴，連唔少網民都大讚《愛回家》追得好貼時事呀！

Text：Girls Editorial

Photo Source：TVB